Во понеделник, 29 мај 2023 година, папата Фрањо ја додели меѓународната награда Павле VI. на претседателот на Република Италија, Серџо Матарела.
Наградата, која се доделува во спомен на папата Монтини, е основана во 1979 година од Институтот Павле VI, а се доделува на поединци или институции кои со своите студии и дела придонеле за растот на религиското значење во светот.
Обраќајќи им се на присутните на доделувањето во салата Клементина во Апостолската палата, папата Фрањо потсети дека папата свети Павле VI. заслужен за Вториот ватикански собор, кој, меѓу другото, ја истакна улогата на верниците лаици, нагласувајќи го нивното световно значење.
Одговорот лежи во зборот „служба“, нагласи Папата. Свети Павле VI. рече дека оние што вршат јавна власт мора да се сметаат себеси за „слуги на своите сонародници, со заинтересираност и интегритет што доликуваат на нивната висока функција“.
Самиот Христос зборуваше за тешкотиите да се служи на другите, напомена Светиот Отец, кој истакна дека „оние кои не живеат за да служат не се ни потребни за живот“. За христијанинот, величината е синоним за служење. „Верувам дека доделувањето на наградата Павле VI на претседателот Матарела, е убава можност за да се покаже вредноста и достоинството на служењето, највисокиот стил на живеење, кој ги става другите пред сопствените очекувања“, рече Светиот Отец.
Обраќајќи се директно на претседателот Матарела, Папата продолжи: „Дека ова е вистината за вас, господине претседателе, сведочи италијанскиот народ“. Папата потсети дека претседателот се откажа од долгоочекуваната пензија кога се врати и зеде нов мандат, во име на службата што државата ја бара од него.
Папата Фрањо во продолжение истакна дека за да биде служењето потполно, мора да се примени одговорност. „Службата оди рака под рака со одговорноста“, рече Папата. „Тоа е, како што и самиот збор укажува, способност да се нудат одговори, потпирајќи се на сопствената посветеност, без да се чека другите да ги дадат“, објасни Папата.
Потоа Папата уште еднаш се сврте кон претседателот Матарела и рече: „Колку пати, претседателе, прво со пример, а потоа и со зборови, повикувавте на ова!“
Завршувајќи го своето излагање, Папата повтори дека „чувството на одговорност и духот на служење за свети Павле VI. се основа за изградба на општествениот живот“. Зад себе остави наследство од градење солидарни заедници, а тоа беше и неговиот сон.
„Среќен сум“, рече папата Фрањо, завршувајќи го својот говор, „да бидам орудие на благодарност во име на сите оние, млади и стари, кои во вас гледаат господар, едноставен господар и пред се кохерентен и пристоен сведок на служење и одговорност“. Папата Монтини ќе беше задоволен, заврши папата Фрањо, цитирајќи ги неговите познати и вистинити зборови: „Современиот човек повеќе сака да слуша сведоци отколку учители, а ако ги слуша учителите, тоа го прави затоа што тие се сведоци“.
Ватикан њуз/к.мк
