По молитвата Ангел Господов во недела 22 септември 2024 година, папата Фрањо како и секоја недела потсети на страдањата на народите кои се во војна. Упати апел и во врска со убиството на црковен активист во Хондурас. Говорот го пренесуваме во целост.
Драги браќа и сестри!
Со тага во моето срце ја примив веста дека во Хондурас е убиен Хуан Антонио Лопез, делегат на Божјото слово, координатор на социјалната пасторална грижа во бискупијата Трухило и основач на пасторалот за целосна еколошка грижа во Хондурас. Ја споделувам тагата на таа Црква и се приклучувам кон осудата на сите форми на насилство. Ја изразувам мојата близина со оние чии основни права се прегазени и со оние кои се залагаат за општото добро како одговор на крикот на сиромашните и на Земјата.
Ве поздравувам сите вас, верници од Рим и ходочесници од Италија и многу земји. Посебно ги поздравувам Еквадорците кои живеат во Рим и ја слават Богородица Сисна! Ги поздравувам членовите на хорот „Teresa Enríquez de Torrijos“ од Толедо, групата семејства и деца од Словачка и мексиканските верници.
Ги поздравувам учесниците на маршот, кој има за цел да ја подигне свеста за условите во кои живеат затворениците. Мора да работиме на тоа затворениците да бидат во достоинствени услови. Секој може да направи грешки. Затворот служи подоцна да продолжи да живее чесен живот. Ја поздравувам делегацијата која дојде по повод Денот на атаксија и членовите на Здружението „La Palma“ од Кастањола ди Маса.
Браќа и сестри, да продолжиме да молиме за мир. За жал, на боиштата владее голема тензија. Нека се слушне гласот на народот кој бара мир! Да не заборавиме на страдањата во Украина, Палестина, Израел, Мјанмар, многу земји кои се во војна. Да молиме за мир.
На сите ви посакувам пријатна недела. И ве молам, не заборавајте да се молите за мене. Добар апетит и догледање.
Ватикан њуз/к.мк
