Папата Лав ги повика младите да се регистрираат за Светскиот ден на младите во 2027 година
На празникот на светиот папа Иван Павле II, основоположникот на Светскиот ден на младите, папата Лав XIV им упати порака на младите ширум светот, повикувајќи ги да се регистрираат за Светскиот ден на младите во Сеул во 2027 година. Тој истакна дека овој настан ќе им овозможи да искусат „уште подлабоко чувство на единство, бидејќи сите сме членови на едното Тело Христово“.
На помалку од една година до следниот Светски ден на младите во Сеул, Јужна Кореја, регистрацијата официјално е отворена.
Во видеопорака упатена до младите ширум светот во четврток, 22 октомври 2026 година, папата Лав XIV ги повика да се пријават, но не само за да „видат нов град“. Напротив, објасни тој, тоа е „повик да тргнат на ходочестие на верата, пријателството и надежта“.
Ходочестието, рече Папата, нуди можност да се откријат христијански места во друга земја, но и да се најдат време и простор за подлабока средба со Бога, лично и заедно со другите во Црквата.
Овој 17. меѓународен Светски ден на младите ќе биде можност младите од целиот свет да се соберат на едно место, покажувајќи го богатството и убавината на различните јазици и култури.
„Сепак, и покрај овие разлики, а всушност токму поради вашата од Бога дарувана различност, ќе искусите уште подлабоко чувство на единство, бидејќи сите сме членови на едното Тело Христово“, нагласи Папата.
За младите, објасни папата Лав, Светскиот ден на младите во 2027 година ќе биде можност да ја продлабочат својата вера и да се сретнат со своите браќа и сестри во Христос. Тој изрази желба тие „да создадат радосни спомени и да изградат пријателства што ќе траат цел живот“.
Донесете ги вашите надежи, борби и соништа
Темата на Светскиот ден на младите во Сеул е: „Бидете храбри! Јас го победив светот“.
Четврток, 22 октомври, е празникот на свети папа Иван Павле II, кој во своето учење постојано ја повторуваше пораката: „Не плашете се. Отворете ги широко вратите за Христос.“
Овие зборови на Папата, кој го започна Светскиот ден на младите, остануваат актуелни и денес. Имајќи го тоа предвид, папата Лав ги повика младите „да донесат сè што се и сè што носат во своите срца, вклучувајќи ги своите соништа, желби и надежи, како и своите рани и борби“.
Бог, нагласи Папата, ги очекува на Светскиот ден на младите. Тој го повикува секого по име и сака „да ја разбуди во вас надежта и да ви ја дарува полнотата на животот и радоста“.
Папата Лав ја заврши својата видеопорака изразувајќи радост поради претстојната средба со младите во Сеул и им го упати својот благослов на сите млади и на нивните најблиски.
Ватикан њуз/к.мк
