Папата Лав XIV се помоли со водачите на разни христијански цркви во Никеја, денешен Изник, Турција, и ги повика сите христијани да ги следат патиштата на братска средба, дијалог и соработка.
На местото на античка Никеја, папата Лав XIV им се придружи на околу 27 други водачи на христијанските цркви за да ја одбележат 1700-годишнината од Првиот Вселенски собор во историјата на Црквата.
Екуменската молитвена служба се одржа на вториот ден од апостолското патување на Папата во Турција.
Во своето обраќање, Папата му се заблагодари на патријархот Вартоломеј I, Вселенски патријарх Цариградски, за неговата „голема мудрост и предвидливост“ во повикот до црковните водачи заедно да ја прослават оваа важна годишнина.
Тој, исто така, изрази благодарност до поглаварите на црквите и претставниците на светските христијански заедници за присуството на настанот.
Папата Лав потсети дека Никејскиот собор се одржал во 325 година, велејќи дека тој ги повикува сите христијани, дури и денес, да се запрашаат кој е Исус Христос за нас лично.
„Ова прашање е особено важно за христијаните“, рече тој, „кои ризикуваат да го сведат Исус Христос на еден вид харизматичен водач или суперчовек, погрешно претставување што на крајот води до тага и збунетост.“
Соборот беше одржан за да одговори на тврдењето на александрискиот свештеник Ариј дека Исус е само посредник помеѓу Бога и човештвото, велејќи дека Тој не е целосно божествен и игнорирајќи ја реалноста на Воплотувањето.
„Но, ако Бог не станал човек, како можат смртните суштества да учествуваат во Неговиот бесмртен живот?“, праша папата Лав. „Она што беше прашање во Никеја, а прашање и денес, а тоа е нашата вера во Бога, кој, во Исус Христос, стана како нас за да нè направи „учесници во божествената природа“.“
Никејскиот собор, рече тој, се согласил за христолошката исповед што сега ја нарекуваме Никејски символ на верата, која ја исповедаат сите христијански цркви и заедници.
Символот на верата, како што е познат, беше од „фундаментално значење на патот што христијаните го прават кон полно заедништво“.
„Верата „во едниот Господ Исус Христос, Единороден Син Божји, роден од Отецот пред сите векови… едносуштен со Отецот“ (Никејско верување)“, рече тој, „е длабока врска што веќе ги обединува сите христијани.“
Папата ги повика христијаните да ја прифатат таа постоечка врска на единство и да патуваат уште подлабоко во „придржување кон Божјото Слово ообјавено во Исус Христос, под водство на Светиот Дух, во меѓусебна љубов и дијалог“.
Со надминување на поделбите и помирување едни со други, христијаните можат да дадат поверодостојно сведоштво за Исус Христос и Неговата објава на надеж за сите, рече тој.
Папата Лав XIV продолжи велејќи дека христијанското единство е многу потребно во нашиот свет исполнет со насилство и конфликти.
„Желбата за полно заедништво меѓу сите верници во Исус Христос е секогаш придружена со потрагата по братство меѓу сите човечки суштества“, рече тој, повикувајќи на признавање на правата и достоинството на сите луѓе, без оглед на нивната етничка припадност, националност, религија или лични перспективи.
Тој ја поддржува улогата на религиите во служењето на вистината и охрабрувањето на поединците да бараат дијалог и почит.
„Мораме силно да ја отфрлиме употребата на религијата за оправдување на војни, насилство или која било форма на фундаментализам или фанатизам“, рече Папата. „Наместо тоа, патиштата што треба да се следат се оние на братска средба, дијалог и соработка.“
На крајот од говорот, папата Лав се помоли Бог Отецот да помогне одбележувањето на 1700-годишнината од Никејскиот собор да донесе „обилни плодови на помирување, единство и мир“.
На крајот од молитвената служба, водачите на христијанските цркви и заедници заедно го молеа Никејско-цариградскиот Символ на верата, изоставувајќи го Филиокве.
Ватикан њуз/к.мк
