Папата Лав XIV на светата Литургија за инаугурација: „Да одиме кон Бога и да се сакаме еден со друг“
Папата Лав XIV ја предводеше светата Литургија по повод инаугурацијата на неговата Петрова служба на плоштадот Свети Петар и ја повикува Црквата да оди заедно по патот на Божјата љубов и да остане обединета во едно семејство.
Поздравувајќи над 200.000 поклоници, водачи од целиот свет и претставници на христијанските деноминации, папата Лав XIV го означи радосниот почеток на неговата Петровска служба, официјално започнувајќи ја со света Литургија на плоштадот „Свети Петар“ во недела, 18 мај.
Меѓу присутните имаше и голем број религиски делегации, кои вклучуваа Евреи, муслимани, хиндуси, будисти, сики, зороастријци и џаинисти.
Срце полно со благодарност
Изразувајќи искрена благодарност за молитвената и радосна поддршка која му беше дадена на почетокот на неговата пастирска служба како папа, Лав XIV се потсети на интензивните емоции кои ги доживеал во текот на изминатите неколку недели.
„По смртта на папата Фрањо, се чувствувавме како овци без пастир“, се присети тој, „но примајќи го неговиот последен благослов на Велигден, со очи на вера, надеж и радост, се сетивме дека Господ никогаш не го напушта својот народ“.
Папата, исто така, им се заблагодари на сите што го придружуваа во молитва Кардиналскиот колегиум кој се состана на конклава за да го избере наследникот на Петар, размислувајќи како да се продолжи со посланието за навестување на Евангелието со пастир способен да одговори на денешните предизвици.
Тој рече дека го чувствувале „делувањето на Светиот Дух, кој донесе хармонија, како кај музички инструменти, така што срцата можеле да вибрираат во една мелодија“.
Обединети во љубов и единство
„Бев избран, без никакви мои заслуги, а сега, со страв и трепет“, рече папата Лав, „доаѓам кај вас како брат, кој сака да биде слуга на вашата вера и вашата радост, одејќи со вас по патот на Божјата љубов, затоа што Тој сака сите да бидеме обединети во едно семејство“.
Папата Лав XIV. потсети дека љубовта и единството се два аспекта на посланието кое Исус му го довери на Петар.
Во ова неделно Евангелие, Исус им доверува на учениците да го продолжат посланието, да бидат „ловци на луѓе“ и да ја донесат „надежта на Евангелието“ на сите луѓе „за сите да ја доживеат Божјата прегратка“.
Искуството на Петар со Божјата „бескрајна и безусловна љубов“, и покрај сопствената слабост и откажување, му овозможи да го преземе ова послание, објасни Папата.
Самопожртвувачка љубов
Папата Лав се присети како на Петар тогаш му било доверено да „љуби повеќе“ и да „го даде својот живот за стадото“.
„Службата на Петар се карактеризира токму со оваа самопожртвувана љубов, бидејќи Римската црква претседава со љубов, а нејзиниот вистински авторитет е љубовта Христова. Никогаш не станува збор за освојување на другите со сила, верска пропаганда или моќ. Наместо тоа, секогаш станува збор само за љубов, како што правел Исус.“
Црквата, знак на единство и заедништво
Светиот Отец изрази надеж дека целата Црква ќе биде обединета од „големата желба за обединета Црква, знак на единство и заедништво, која ќе биде квасец за помирен свет“.
Соочени со свет обележан со толку многу несогласувања и рани предизвикани од омраза, насилство, предрасуди, страв и економска реалност „која ги експлоатира ресурсите на Земјата и ги маргинализира најсиромашните“, рече Папата, „сакаме да бидеме мал квасец на единство, заедништво и братство во светот“.
„Сакаме да му кажеме на светот, со понизност и радост: Гледајте кон Христос! Приближете се кон Него! Прифатете го Неговото Слово кое просветлува и утешува! Слушнете ја Неговата понуда на љубов и бидете дел од Негово едно семејство: во еден Христос сме едно“, поттикна тој. „Ова е патот што треба да го одиме заедно, меѓу себе, но и со нашите сестрински христијански цркви, со оние што следат други религиозни патишта, со оние што го бараат Бога, со сите жени и мажи со добра волја, со цел да изградиме нов свет во кој владее мир!“
Папата го поддржа мисионерскиот дух, додавајќи дека таков пристап ќе ја спречи Црквата да се затвори во мали групи или да има чувство на супериорност во светот.
„Повикани сме да им ја понудиме Божјата љубов на сите, за да постигнеме единство кое не ги поништува разликите, туку ја почитува личната историја на секој човек и општествената и верска култура на секој народ“, рече тој.
„Браќа и сестри, ова е време за љубов! Срцето на Евангелието е Божјата љубов која нè прави браќа и сестри.“
Како заклучок, папата Лав XIV. ги повика сите христијани да бидат просветлени од Светиот Дух, за да можеме да изградиме Црква „основана на Божјата љубов, знак на единство, мисионерска Црква која ги отвора своите раце кон светот, го навестува Словото, дозволува историјата да ја „направи немирна“ и да стане квасец на хармонија за човештвото“.
„Заедно, како еден народ, како браќа и сестри, ние одиме кон Бога и се сакаме еден со друг.“
Ватикан њуз/к.мк
