Папата: Граѓанската слога им овозможува на сиромашните да бидат прифатени, а услугите да стигнат до сите
На аудиенција со префектите на Италија, папата Лав XIV ги повика државните службеници да го чуваат доброто на народот, за сите да имаат корист од владеењето на правото и еднаков пристап до јавните услуги.
Папата Лав XIV се сретна во понеделник, 16 февруари 2026 година, со префектите на Италијанската Република, кои ја претставуваат извршната власт на државата на покраинско ниво.
Во својот говор, Папата потсети на древната врска меѓу префектите и бискупите во Римската Империја, кога и едните и другите се грижеа за различни аспекти од животот на граѓаните.
Тој го посочи свети Амвросиј од Милано, кој служел како префект на градот кога тој бил главен град на Римската Империја, а потоа бил прогласен за негов епископ од локалниот народ.
„По оваа брза промена, Амвросиј ги извршуваше своите јавни должности на нов начин, ставајќи ја во служба на народот духовната власт со која беше обдарен“, забележа Папата.
И денес, рече папата Лав, Црквата и Италијанската држава соработуваат за да се грижат за духовните и за временските потреби на луѓето.
„Нашето време, обележано со конфликти и меѓународни тензии“, рече тој, „особено ја истакнува важноста од заштита на општото добро, кое не може да се сведе само на материјалните аспекти, бидејќи се однесува и на моралното и духовното наследство на Италијанската Република.“
Со чувањето на социјалната слога во Италија, рече тој, префектите го унапредуваат општествениот ред, така што сиромашните ќе бидат прифатени, старите ќе имаат поголем внатрешен мир, а семејствата, младите и болните ќе ги добијат неопходните услуги.
Јавниот ред, додаде тој, бара и борба против криминалот и напори за спречување на облиците на насилство, лаги и вулгарност што создаваат раздор.
Папата потсети дека државните службеници се должни да му служат за доброто на народот, а тоа, рече тој, бара внатрешна дисциплина и исправна совест.
Префектите на Италија, рече Светиот Отец, работат на поттикнување соработка меѓу различните државни институции, а истовремено ја чуваат професионалната одговорност и исправниот начин на живот.
„Особено во вонредни ситуации, пред катастрофи или опасности, вашата улога овозможува на најдобар начин да се изразат вредностите на солидарноста, храброста и правдата што ја красат Италијанската Република“, рече тој.
Папата, препознавајќи ги предизвиците што ги носат новите технологии, вклучително и вештачката интелигенција, за јавната администрација, и ги повика префектите да ги користат така што сите жители на Италија ќе имаат корист.
Папата Лав XIV ја вети соработката и почитта на Католичката Црква за доброто на Италијанската држава.
На крајот, тој им се заблагодари на италијанските државни службеници што негуваат стил на граѓанство кое е „свесно, чесно и активно“.
Ватикан њуз/к.мк
