Папата го поздрави договорот меѓу САД и Иран и повика на меѓусебна доверба на Блискиот Исток
Папата Лав XIV изрази надеж за мир на Блискиот Исток, додека САД и Иран се подготвуваат да потпишат договор. Светиот Отец упати и нов апел за крај на војната во Украина.
За време на Генералната аудиенција во среда, 17 јуни 2026 година, папата Лав XIV ги повика Иран и Соединетите Американски Држави да продолжат по патот на дијалогот и соработката.
Се очекува двете земји во петок да потпишат Меморандум за разбирање, по речиси четири месеци војна.
„Со задоволство го поздравувам постигнувањето на договор меѓу Исламската Република Иран и Соединетите Американски Држави, кој ќе биде потпишан во петок, како охрабрувачки резултат на трпелива работа на дијалог и преговори“, рече Папата.
Светиот Отец им се заблагодари и на земјите што посредувале и придонеле за олеснување на мировните разговори.
„Се надевам дека овој договор ќе помогне во зајакнувањето на меѓусебната доверба, безбедноста и стабилноста на Блискиот Исток, промовирајќи патишта на дијалог и соработка меѓу народите“, истакна папата Лав XIV.
Договор по месеци воени тензии
САД и Израел започнаа воздушни напади врз Иран на 28 февруари, насочени кон нуклеарната и балистичката ракетна програма на земјата.
Иран одговори со контранапади врз Израел, како и врз американските бази и сојузници во регионот на Заливот. Во исто време, беше попречен и сообраќајот низ Ормутскиот Теснец.
Во тој контекст, Папата го оцени договорот како важен чекор кон намалување на тензиите и отворање простор за нова дипломатска фаза.
Апел за Украина
Папата Лав XIV се осврна и на војната во Украина, изразувајќи жалење поради зголемениот број жртви, во време кога Русија ги интензивира нападите врз земјата, особено врз украинските градови.
„Има многу невини жртви, убиени спасувачи, цркви и места на културното наследство уништени од пламен“, рече Папата.
Тој изрази блискост со сите што тагуваат по своите најблиски, со ранетите, како и со оние кои, и покрај насилството, храбро продолжуваат да му служат на животот.
Светиот Отец ги покани сите верници да се молат за крај на војната во Украина.
„Ги повикувам сите да се молат за да заврши оваа војна“, рече папата Лав XIV. „Да го молиме Господ да отвори патишта за дијалог, да ја изгаси омразата и да овозможи праведен и траен мир.“
Ватикан њуз/к.мк
