На прелиминарниот состанок во Рим за системите со храна, папата Фрањо потсети дека „искоренувањето на неправдата“ со гладот во светот е одговорност на сите и мора да се реши преку храбри политики. Пораката на Папата ја прочита монсињор Пол Ричард Галагер, секретар за односи со државите.
Предизвик, скандал, криминал, неправда: со овие зборови, Папата го идентификува гладот, несигурноста во исхраната и неухранетоста во ерата на Ковид-19 во порака до генералниот секретар на ООН, Антонио Гутереш, а по повод прелиминарниот состанок на храна на ООН во Рим од 26 до 28 јули. Настанот е дел од подготовките за последниот самит на глобалните системи за храна во Њујорк во септември.
Ова е „важен состанок“, пишува папата Фрањо, пред сѐ затоа што „оваа пандемија нè соочи со системски неправди што го загрозуваат нашето единство како човечко семејство“. Меѓу нив се сиромаштијата и штетата направена на земјата, „нашиот заеднички дом“, преку „неодговорната употреба и злоупотреба на добрата што Бог ги ставил во неа“.
Потребни ни се радикални промени
Оттука и силниот повик на Папата за „радикални промени“: не е доволно да се фокусираме на технологии за зголемување на производството на планетата, ако резултатот е да се „стерилизира природата“ со „проширување и на надворешните и на внатрешните духовни пустини“; не е доволно да се произведе „доволно храна ако многумина останат без леб.“ Не е доволно, објаснува папата Фрањо, затоа што „ова е вистински скандал, злосторство што ги крши основните човекови права. Неправда за која сите имаме одговорност, која треба да се искорени преку конкретни активности, добри практики и храбра национална и меѓународна политика“.
Никој да не биде напуштен
На крајот од пораката стои дека секој има „одговорност да го реализира“ сонот, а тоа е „свет во кој лебот, водата, лекот и работата течат во изобилство и први стигнуваат до најсиромашните“. Тоа е „благородна цел“ во чија служба Светиот Престол и Католичката црква го нудат својот придонес со обединување на силата и волјата, мудри постапки и одлуки“. „Никој не смее да биде напуштен“, заклучи Папата, „и секој мора да може да ги задоволи неговите основни потреби“ за да може да се вклучи во градењето на „мирно, просперитетно“ и навистина братско општество.
Ватикан њуз/к.мк
