Околу 147 новоименувани епископи од пет континенти учествуваат на ватикански курс за формација, посветен на мисијата, пастирската служба, заштитата на малолетници, Литургијата и управувањето со Црквата. Програмата ќе заврши со аудиенција кај папата Лав XIV.
Повеќе од 140 епископи од пет континенти учествуваат на годишниот курс за формација на новоименувани епископи, кој се одржува од 2 до 10 септември во Рим.
Курсот, организиран од Дикастеријата за епископи и Дикастеријата за евангелизација, им нуди на новоименуваните пастири можност за формација, молитва, дијалог и братство. Воедно, програмата се осврнува и на некои од главните предизвици со кои Црквата се соочува денес.
Оваа година учествуваат вкупно 147 епископи. Од нив, 98 го следат курсот организиран од Дикастеријата за епископи, со наслов Во Христос, чувари на величественоста на човештвото во време на преобразби, додека 49 учествуваат на курсот што го промовира Дикастеријата за евангелизација, Секција за прва евангелизација, со наслов Слуги на заедништвото во Црквата.
Програмата опфаќа широк спектар теми: епископската служба, литургијата, мисијата, културните промени, заштитата на малолетници и справувањето со случаи на злоупотреба, управувањето со Црквата, канонското право, меѓурелигискиот дијалог, новите црковни движења, формацијата на свештенството и предизвиците со кои се соочуваат свештениците.
Курс на Дикастеријата за епископи
Курсот на Дикастеријата за епископи беше отворен на 2 септември со обраќање на кардиналот Артур Рош, префект на Дикастеријата за Божествено богослужение и дисциплина на Светите Тајни.
Следниот ден, кардиналот Клаудио Гуџероти, префект на Дикастеријата за Источните цркви, зборува за епископската служба, додека надбискупот Виторио Виола, секретар на Дикастеријата за Божествено богослужение, ќе се осврне на литургијата.
На 4 септември, надбискупот Луис Хавиер Аргело Гарсија, претседател на Шпанската бискупска конференција, ќе размислува за мисијата на пастирот во семејството и општеството.
Потоа ќе следи сесија за заштита на малолетници, превенција и справување со случаи на злоупотреба, која ќе ја води надбискупот Тибо Верни, претседател на Папската комисија за заштита на малолетници. Кардиналот Пјетро Паролин, државен секретар, ќе го заврши денот со размислување за улогата на Светиот Престол во глобализираниот свет и неговата работа за мир.
На 5 септември, кардиналот Хозе Толентино де Мендонса, префект на Дикастеријата за култура и образование, ќе се осврне на современите културни промени, додека кардиналот Анџело Де Донатис, главен пенитенцијар, ќе зборува за внатрешното преобраќање.
Курс на Дикастеријата за евангелизација
Курсот за формација на епископите кои служат во црковни јурисдикции доверени на Дикастеријата за евангелизација се одржува во Папскиот мисионерски колегиум „Свети апостол Петар“.
Програмата започна на 3 септември со вовед во Дикастеријата за евангелизација и во нејзината служба кон Црквите во мисионерските територии.
Меѓу говорниците се кардиналот Луис Антонио Тагле и надбискупот Фортунатус Нвачукву, а темите вклучуваат племенска припадност, кастински поделби, расизам и исклучив регионализам, како и дисциплина на свештенството, посветен живот, финансиско управување и здруженија на верници.
На 4 септември, кардиналот Џорџ Јакоб Кувакад, префект на Дикастеријата за меѓурелигиски дијалог, ќе зборува за меѓурелигискиот дијалог, додека надбискупот Аурелио Гарсија Масијас ќе се осврне на континуитетот и обновата во литургијата во контекст на првата евангелизација.
Кардиналот Курт Кох, префект на Дикастеријата за промовирање на христијанското единство, ќе се фокусира на сектите и новите црковни движења.
Програмата на 5 септември ќе биде посветена на правната димензија на епископското управување, вклучувајќи ги епархиските структури, трибуналите и решавањето случаи поврзани со delicta graviora, односно потешки престапи. Денот ќе вклучи и сесија за пастирска придружба и формација во грижата за Божјиот народ.
Ходочестие во Асизи и заеднички сесии
Неделата ќе биде ден за одмор, а учесниците ќе имаат можност да одат на ходочестие во Асизи, во рамките на Јубилејната година по повод 800-годишнината од смртта на свети фрањо.
Програмата продолжува на 7 септември на Папскиот универзитет „Урбанијана“ со заедничка сесија за учесниците на двата курса. Кардиналот Мајкл Черни, почесен префект на Дикастеријата за промовирање на интегрален човечки развој, ќе ја претстави енцикликата Magnifica humanitas на папата Лав XIV.
Потоа кардиналот Марио Грех, генерален секретар на Синодот на епископите, и кардиналот Роберто Реполе, надбискуп на Торино, ќе размислуваат за синодалната еклисиологија.
На 8 септември, на празникот Рождество на Пресвета Богородица, епископите ќе се соберат во базиликата „Света Марија Велика“ на света Литурија која ќе ја предводи кардиналот Балдасаре Реина, генерален викар на Римската епархија.
Програмата потоа ќе продолжи на „Урбанијана“ со сесии за формација на свештенството и за мисионерскиот однос меѓу локалните Цркви и Светиот Престол.
На 9 септември, монсињор Питер Бер од Папскиот Грегоријански универзитет ќе зборува за управување со кризи во рамките на свештенството, додека отец Ханс Цолнер ќе се осврне на одговорноста на Црквите за заштита на малолетниците и ранливите возрасни лица. Попладневната работилница ќе им овозможи на учесниците да работат во јазични групи.
Средба со папата Лав XIV
Курсот ќе заврши на 10 септември со света Литургија и ходочестие пред гробот на апостол Петар во базиликата „Свети Петар“, предводени од кардиналот Мауро Гамбети, архипрезвитер на базиликата.
Програмата ќе заврши со аудиенција кај папата Лав XIV, во која ќе се обединат темите за формација, молитва и братство што ги одбележаа овие денови на подготовка за епископската служба.
Ватикан њуз/к.мк
