По убиството на мексикански наркобос во воена операција и по последователните бранови насилство од организираниот криминал во различни делови од земјата, мексиканските бискупи повикуваат на воздржаност, молитва и разумност, предупредувајќи да се избегнува непотребно патување во ова тешко време.
„Мир ви оставам; Својот мир ви го давам. Јас не ви го давам како што светот дава. Да не се вознемирува вашето срце и да не се плаши.“ (Иван 14,27)
Со овој цитат мексиканските бискупи го започнуваат писмото што го објавија под наслов „Божјиот народ што патува како ходочесници во Мексико“, со кое се осврнуваат на распространетото насилство во земјата.
Во изјавата, потпишана од бискупот Рамон Кастро Кастро, претседател на Мексиканската епископска конференција, и бискупот Хектор М. Перес Виљареал, генерален секретар на Мексиканската бискупска конференција, тие повикуваат на засилени молитви за мир и предупредуваат да се избегнува непотребно патување во ова тешко време.
Повик на разумност и молитва
„Среде моментите на насилство што се доживуваат во различни региони на нашата земја, како реакција на операцијата против водачот на една криминална група“, наведуваат тие, „сакаме да бидеме блиски на секого од вас, на вашите семејства и заедници, споделувајќи ја вашата загриженост и повикувајќи на разумност и молитва.“
„Со пасторален и братски дух“, продолжуваат тие, „ве повикуваме да ги зајакнете личните и заедничките мерки за безбедност, да останете во своите домови кога тоа е потребно и да избегнувате непотребни патувања, секогаш следејќи ги упатствата на граѓанските власти.“
Мексиканската бискупска конференција ги повика верниците да ги засилат молитвите за „мирот што на нашата нација ѝ е толку потребен, во семејствата, во парохиите, на неделната Евхаристија и во секоја заедница“.
Доверување на Мексико на Пресвета Богородица од Гвадалупе, Царица на мирот
Мексиканските бискупи изразуваат надеж дека нивната молитва може да биде „уверлива молба до Исус Христос, Господарот на историјата и Кнезот на мирот“, но и обврска „да бидеме сејачи на помирување и братство“.
На крајот, бискупите го доверуваат Мексико на мајчинското застапништво на Богородица од Гвадалупе, Царица на мирот, „да нè покрие со својот плашт, да ги заштити нашите семејства и да ни помогне да градиме патишта на правда, мир и надеж“. Тие се молат за Господова сила и да даде „да ги поминеме овие мигови обединети, со разумност, солидарност и вера“.
Насилството ескалира по убиството на „Ел Менчо“
Ројтерс објави дека мексиканските сили го убиле Немесио Рубен Осегера Сервантес, познат како Ел Менчо, водачот на моќниот картел „Халиско Нова генерација“, во воена операција која претставува сериозен удар врз една од најстрашните криминални групи во земјата.
Неговата смрт, опишана како значајна победа за мексиканските власти и за безбедносната соработка меѓу САД и Мексико, предизвикала широко насилно одмаздничко дејствување од страна на картелот, вклучувајќи блокади на патишта и палење возила во повеќе мексикански држави.
Ватикан њуз/к.мк
