Каритас Интернационалис предупредува дека предизвиканиот глад во Газа претставува флагрантно кршење на меѓународното право, вклучително и на Конвенцијата за спречување и казнување на злосторството геноцид, и повикува на итна глобална акција за почитување на човековото достоинство и заштита на животot na civilite
Како одговор на катастрофалните случувања во Газа, каде што израелските сили го нападнаа градот Газа на 20 август — град во кој сега се сместени речиси еден милион раселени цивили — Каритас Интернационалис издаде соопштение со наслов „Сведок на овој ужас“.
Два дена подоцна, Обединетите нации официјално прогласија глад во енклавата. Каритас нагласува дека ситуацијата драстично се влошила: 273 лица починале од глад, меѓу нив 112 деца.
„Декларацијата не беше предупредување“, се вели во соопштението, „туку мрачна потврда на она што хуманитарните организации го кажуваат со месеци: жителите на Газа долго време трпат намерно предизвикан глад“.
Пресметани одлуки
Овие смртни случаи, продолжува Каритас, не се трагични несреќи, туку резултат на пресметани одлуки. Луѓето во Газа се лишени од основните потреби — засолниште, егзистенција и безбедност.
„Ова не е војна. Ова е систематско уништување на животот на цивилите.“
Каритас Интернационалис ја опишува опсадата на Газа како „машинерија за уништување“. За разлика од гладот предизвикан од природни катастрофи, овој е предизвикан од човекот — директна последица на намерна стратегија: „блокирање на помош, бомбардирање на конвои со храна, уништување на инфраструктура и одземање на основните потреби“.
Во соопштението се наведува дека цивилите — особено жените и децата — го носат најтешкиот товар на ова гладување, бомбардирање и раселување. Владите, организациите и мултинационалните корпорации го овозможиле ова страдање преку финансиска поддршка, воена помош и дипломатска заштита.
„Нивното молчење не е неутралност. Тоа е одобрување.“
Празни зборови
Во меѓувреме, истакнува Каритас, меѓународната заедница изгледа дека нуди само празни декларации и фрази. Овие „двојни стандарди“, продолжува соопштението, служат единствено за купување време за понатамошно уништување.
„Каритас Интернационалис гледа во Газа намерен напад врз човековото достоинство и колапс на моралниот поредок, пропаѓање на лидерството, одговорноста и самата човечност.“
Каритас Интернационалис нагласува дека ги осудува овие дела и пропусти со најсилни зборови. „Тие претставуваат очигледно непочитување на вредностите и основните принципи на човештвото и јасно го прекршуваат меѓународното право, меѓународното хуманитарно право и меѓународното право за човекови права, како и бројни одредби од конкретни конвенции на Обединетите нации, вклучително и Конвенцијата за спречување и казнување на кривичното дело геноцид.“
Повик вкоренет во верата
Каритас потсетува на зборовите на папата Фрањо во „Fratelli Tutti“: „Или сите заедно ќе се спасиме или никој нема да се спаси“. Светото Писмо, исто така, повикува на дејствување: „Зборувајте за оние што не можат да зборуваат за себе“ (Изреки 31,8) и „Што не сте направиле за еден од овие најмали, не сте направиле ни за мене“ (Матеј 25,45).
Во оваа позадина, организацијата упатува серија итни барања. Повикува на итен и траен прекин на огнот, како и на неограничен хуманитарен пристап за испорака на храна, лекови и основна помош. Инсистира на ослободување на сите заложници и произволно задржани лица, како и на распоредување на мировни сили на Обединетите нации за заштита на цивилите.
Каритас дополнително ја истакнува потребата за заштита на тие кои не војуваат, особено децата, жените и старите лица, како и одговорност за сторителите и овозможувачите пред националните и меѓународните судови.
Во соопштението се нагласува и важноста од целосно спроведување на Советодавното мислење издадено од Меѓународниот суд на правдата на 19 јули 2024 година, кое повикува на прекин на незаконското присуство на Израел на окупираната палестинска територија. Ова подразбира прекин на активностите за населување, евакуација на доселениците, обезбедување репарации и обврзувачка акција од телата на Обединетите нации за ставање крај на окупацијата.
„Тест за морален интегритет“
„Гладот во Газа е тест за моралниот интегритет, а многумина не успеаја“, се наведува во соопштението. „Да се изгладни населението значи да се оскверни животот. Да се молчи значи да се биде соучесник.“
Каритас Интернационалис апелира до сите луѓе на верата и совеста да го кренат својот глас, да извршат притисок врз своите влади и да бараат правда.
„Светот гледа. Историјата бележи. А Газа чека, не на зборови, туку на спасение.“
Ватикан њуз/к.мк
