На Генералната аудиенција, папата Лав XIV го потврди позитивното влијание што христијанската вера го има врз секоја култура, нагласувајќи дека верата ги повикува верниците на плодна интеграција на знаењето.
Папата Лав XIV го продолжи циклусот катехези посветени на Gaudium et spes од Вториот ватикански собор, за време на Генералната аудиенција во среда, 28 октомври 2026 година, на плоштадот „Свети Петар“.
Папата се осврна на односот меѓу културата и христијанската вера, како што е претставен во второто поглавје од Пасторалната конституција.
Во секое време, рече тој, Католичката црква настојувала навестувањето на Евангелието да го придружува со основање образовни институции, придонесувајќи за културното, човечкото и духовното формирање.
Тој укажа на влијанието што средновековните универзитети го имале врз обликувањето на западната цивилизација, нагласувајќи дека критичкото размислување ги поттикнува верниците да дадат образложение за својата вера.
Истовремено, секоја култура на свој начин ги поттикнува луѓето да го отворат својот ум кон духовната димензија што е вкоренета во човечката природа.
Изразувајќи ја човечката потрага по смисла, секоја култура на тој начин го подготвува човекот да го прими Христовото Евангелие, рече Папата.
„Односот меѓу верата и културата ја наоѓа својата основа во Воплотувањето“, рече тој. „Како што Божјото Слово стана тело и се всели меѓу нас, така и верата е воплотена стварност, испреплетена со културата во која живее.“
Верата, продолжи папата Лав, се воплотува во секоја култура, но не се поистоветува со ниту еден нејзин конкретен израз.
„Верата живее во нив“, рече тој, „обликувајќи ги однатре според ‘образот’ на Исус Христос, односно преку милосрдието, служењето и синовското признавање на Божјото татковство.“
На ист начин, Црквата го прифаќа она што е добро, убаво и вистинито во различните култури, за преку нив да ја пренесува верата и евангелската порака.
Папата Лав потсети и на желбата на Црквата да ја промовира културата како вредност сама по себе и како служба на човекот, особено преку образованието достапно за сите.
Gaudium et spes, рече тој, ја нагласува потребата образованието да го прифати „единството на знаењето“.
Христијаните, додаде Папата, преку Откровението ги примиле одговорите на најдлабоките прашања за човековото постоење. Сепак, тоа не ги ослободува од потребата за трпеливо интелектуално и културно формирање.
„Напротив“, рече тој, „човечкото и научното знаење на христијаните мора да оди рака под рака со суштината на нивната вера, која постојано треба да се продлабочува во текот на животот и во согласност со нивното ниво на образование.“
На крајот, папата Лав XIV нагласи дека Црквата мора да негува плодна интеграција на различните облици на знаење, која ќе се изразува во начин на живеење на верата „обележан со позитивен поглед кон светот и историјата“.
„Затоа, верата ја збогатува и исполнува секоја култура со која се среќава, а и самата е повикана да стане култура обликувана од Христос.“
Ватикан њуз/к.мк
