Моќта на Младенецот Исус не е моќта на овој свет која се темели на силата и богатството, туку тоа е моќта на љубовта – рече Светиот Отец во своето традиционално обраќање до „Градот и светот“ (Urbi et Orbi).
Централно место во неговото обраќање имаше мирот. Папата на почетокот од своето размислување потсети на зборовите на пророкот Исаија: „Зашто Младенец ни се роди – Син ни се даде; власта е на рамењата Негови, и ќе Го наречат: Советник, Чудесни, Бог силен, Отец вечен, Кнез на мирот“ (9,5).
Истакнувајќи дека Божјата моќ не е моќта на овој свет, туку моќта на љубовта, продолжи објаснувајќи дека тоа е моќта која го создаде светот и сѐ одржува во постоење; дека таа е моќ која го обновува животот, ги простува гревовите, ги помирува непријателите, го преобразува злото во добро. Таа моќ на љубовта го доведува Исус Христос да ја соблече својата слава и да стане човек; таа љубов го доведува до тоа да го положи својот живот на крстот и да воскресне од мртвите. Тоа е моќ на служењето која во нашиот свет го воспоставува Царството Божјо, царството на правдата и мирот.
Папата истакна дека Исусовото раѓање е придружено со ангелската песна: „Слава на Бога во висините, а на земјата мир и меѓу луѓето добра волја“ (Лк 2, 14). Оваа порака денес оди до краиштата на земјата за да дојде до сите луѓе посебно до оние ранетите од војна и горчливите конфликти и до оние кои чувствуваат искрена желба за мир – рече Светиот Отец и потоа на сите луѓе на земјата кои се погодени од немири, конфликти и други несреќи им посака мир.
Мир на мажите и жените во измачената Сирија каде е пролеано премногу крв. Посебно во градот Алепо кој во последните недели ги проживеа најстрашните конфликти, потребено му е најбрзо од било кога – почитувајќи го притоа хуманитарното право – да се обезбеди помош и поддршка на исцрпените цивили кои сѐ уште се наоѓаат во очајна ситуација, во ситуација на тешки страдања и беда. Време е најпосле засекогаш да престанат вооружените конфликти и меѓународната заедница активно да работи на постигнување на договор за повторно да се воспостави мирен соживот во таа земја – рече Папата.
Папата посака мир на луѓето во саканата Света Земја и изрази надеж дека Израелците и Палестинците ќе имаат храброст и одлучност да напишат нова страница во историјата во која омразата и осветата ќе отстапат место на желбата заеднички да се гради иднината со меѓусебно разбирање и хармонија. Светиот Отец исто така посака Ирак, Либија и Јемен повторно да пронајдат мир и слога.
Мир на луѓето во различните африкански региони – продолжи Папата – посебно во Нигерија, каде фундаменталистичкиот тероризам ги користи дури и децата за да шири страв и смрт. Мир во Јужен Судан и Демократската Република Конго: нека се надминат поделбите и сите луѓе со добра волја да тргнат по патот на развојот и споделувањето, давајќи предност на културата на дијалогот пред логиката на конфликтот. Светиот Отец потоа посака мир на луѓето кои сѐ уште страдаат заради последиците на конфликтот во источна Украина и истакна дека таму итно е потребна заедничка желба за да се донесе олеснување на народот и на дело да се спроведат преземените обврски.
Папата Фрањо потоа се молеше за слога меѓу колумбискиот народ кој настојува да оствари нов и храбар пат на дијалог и помирување. Тој изрази желба дека таа храброст ќе ја поттикне саканата Венецуела да ги преземе неопходните чекори за да стави крај на моменталните тензии и заедно да изградат иднина на надеж за целиот народ.
Светиот Отец исто така посака мир на оние кои страдаат заради постојаните закани и неправди. Посака Мјанмар да ги зацврсти своите настојувања околу промовирањето на мирниот соживот и со помош на меѓународната заедница да ја пружи потребната заштита и хуманитарна помош на сите на кои тоа итно им е потребно. Нека Корејскиот полуостров најде начин за да се надминат тензиите со обновен дух на соработка – рече Папата и продолжи:
Мир на оние кои се ранети или ги загубиле сакани личости во бруталните терористички напади кои сеат страв и смрт во срцата на многу земји и градови. Мир – не само со збор, туку вистински и конкретен мир – на напуштените, исклучените, гладните и жртвите на насилството. Мир на бегалците и мигрантите, на сите оние кои денес се жртви на трговијата со луѓе. Мир на луѓето кои страдаат заради економските амбиции на неколкумина, заради алчноста и идолопоклонството на парите кои водат во ропство. Мир на оние кои се погодени од општествени и економски несреќи како и на оние кои трпат заради последиците на земјотрес или други природни катастрофи.
Папата Фрањо на овој посебен ден кога Бог стана дете посака мир на децата, посебно на оние на кои гладот, војните и себичноста на возрасните им ја одземаа радоста на детството. Мир на земјата на сите луѓе со добра волја кои секојдневно тивко и трпеливо работат во семејството и општеството за да изградат похуман и поправеден свет; тие луѓе се уверени дека само со мирот постои иднина на благосостојба за сите – рече Папата и додаде: Драги браќа и сестри, „Младенец ни се роди –Син ни се даде“: Кнез на мирот. Да му искажеме добредојде.
Папата потоа го даде благословот Urbi et Orbi поделувајќи потоа целосна прошка согласно црковите прописи. Светиот Отец своето обраќање го заврши со следните зборови: „На вас браќа и сестри кои сте на овој плоштад од сите страни на светот како и на вас кои нѐ следите преку радио, телевизија и другите медиуми ви ги упатувам своите искрени честитки. На овој радосен ден сите сме повикани да Го гледаме Младенецот Исус Кој ја враќа надежта на секој човек на лицето на земјата. Со неговата милост со своите гласови и дела да ја сведочиме солидарноста и мирот. Среќен Божиќ на сите!
РВ/к.мк
Не е дозволено преземање на оваа содржина или делови од неа за понатамошно користење во печатена, дигитална или било која друга форма за умножување без писмена дозвола од редакцијата на Католици.мк
