Папата Лав XIV нема да ја оствари планираната посета на Асизи на 27 октомври, по совет на неговите лекари, кои потврдија дека закрепнувањето по неодамнешната торакална операција напредува многу добро.
Канцеларијата за печат на Светиот Престол во петок, 22 октомври 2026 година, соопшти дека папата Лав XIV нема да може да присуствува на средбата „Невооружен и разоружувачки мир“ во Асизи на 27 октомври.
„За да се потпомогне закрепнувањето по торакалната операција на која беше подложен минатиот вторник, папата Лав XIV нема да може да присуствува на средбата ‘Невооружен и разоружувачки мир’ во Асизи на 27 октомври, како што беше планирано“, се наведува во соопштението. „Средбата ја одбележува 40-годишнината од Светскиот ден на молитва за мир, свикан од свети Иван Павле II.“
Според Канцеларијата за печат на Светиот Престол, Папата ќе испрати порака со која ќе ја изрази својата близина со „организаторите, водачите и претставниците на христијанските деноминации и другите религии, како и со гостите што ќе присуствуваат“.
Во соопштението се нагласува дека Светиот Отец и понатаму е уверен „дека дијалогот во ‘Духот на Асизи’ и потрагата по зборови и гестови на мир претставуваат скапоцени средства во време обележано со конфликти“.
Во исто време, д-р Луиџи Карбоне и професор Стефано Маргаритора соопштија дека Светиот Отец бил подложен на планирана рендгенска снимка на градниот кош, која потврдила дека неговото „постоперативно закрепнување напредува многу добро“.
„Светиот Отец беше подложен на планирана рендгенска снимка на градниот кош. Прегледот потврди дека неговото постоперативно закрепнување напредува многу добро. Сепак, со оглед на краткиот период што помина од операцијата, неговите лекари, како мерка на претпазливост, го советуваа да не патува со хеликоптер на 27 октомври“, се наведува во соопштението објавено во петокот од Канцеларијата за печат на Светиот Престол.
Соопштението доаѓа по операцијата на папата Лав XIV на 13 октомври, при која му беше отстранет долниот лобус на десното белодробно крило.
Лекарите на Папата во средата соопштија дека со операцијата бил целосно отстранет малигниот аденокарцином на белите дробови и дека дополнителните испитувања потврдиле оти „не е потребен понатамошен третман“.
„Невооружен и разоружувачки мир“
Мировната средба во Асизи е организирана од Заедницата „Свети Егидиј“ и ќе се одржи од 25 до 27 октомври.
Со неа се одбележува 40-годишнината од историскиот Светски ден на молитва за мир, свикан од свети папа Иван Павле II во 1986 година.
Заедницата „Свети Егидиј“ оттогаш го продолжува „Духот на Асизи“ преку годишни меѓурелигиски средби во Европа и во други делови од светот.
Се очекува овогодишниот настан, насловен „Невооружен и разоружувачки мир“, да собере 384 претставници на религии, култури и институции од 53 земји.
Во рамките на 24 тематски форуми ќе се разговара за прашања поврзани со конфликтите, разоружувањето, миграцијата, сиромаштијата, младите и улогата на религиите во градењето мир.
Ватикан њуз/к.мк
