За време на своето обраќање пред молитвата „Царице небесна“ во Ватикан, папата Лав XIV ги потсети верниците дека Исус нè сака засекогаш и безусловно, и дека Неговата љубов кон нас нè поттикнува да ги сакаме другите.
„Господ не нè остава сами во животните искушенија“, ги увери папата Лав XIV верниците за време на своето обраќање пред молитвата „Царице небесна“ во Ватикан, во недела 10 мај 2026 година.
Пред да ја изговори пладневната маријанска молитва за Велигден, Светиот Отец се осврна на Евангелието според Иван за тој ден, во кое Исус, на Последната вечера, им вели на своите ученици: „Ако Ме љубите, ќе ги пазите Моите заповеди“.
„Оваа изјава“, рече папата Лав, „нè ослободува од заблудата дека сме сакани затоа што ги пазиме заповедите, како нашата праведност да е предуслов за Божјата љубов“. Потоа додаде: „Божјата љубов е услов за нашата праведност“.
„Ние навистина ги пазиме заповедите, според Божјата волја“, објасни тој, „кога ја препознаваме Неговата љубов кон нас, токму онака како што Христос му ја откри на светот“. Папата појасни дека зборовите на Исус се повик да се влезе во однос, ослободен од секоја логика на уцена или сомнителен ултиматум.
Љубовта на Исус е таа што раѓа љубов во нас
Токму поради тоа, објасни папата Лав, Господ ни заповеда да се сакаме еден со друг како што Тој нè возљуби нас.
„Љубовта на Исус е таа што раѓа љубов во нас“, истакна Светиот Отец, додавајќи: „Самиот Христос е мерилото на вистинската љубов: љубов верна засекогаш, чиста и безусловна“.
„Бидејќи Бог прв нè возљуби нас“, рече тој, „и ние можеме да љубиме; и кога навистина Го љубиме Бога, навистина се љубиме еден со друг“.
Папата Лав објасни дека истото важи и за самиот живот: „Само оние што примиле живот можат да живеат; така и само оние што биле сакани можат да сакаат“.
Затоа, тој ги нарече Господовите заповеди „начин на живот што нè лекува од лажните љубови и духовен животен стил што е пат за спасение“.
Господ ветува дека ќе остане со нас
Токму затоа што Христос нè сака, рече Светиот Отец, Тој не нè остава сами во животните искушенија, туку „ни го ветува Утешителот, односно Застапникот, Духот на вистината“.
Дури и среде злата во светот, посочи тој, повикани сме да „сведочиме за Бога, Кој е љубов, секогаш и насекаде“.
Во нашата мисија на љубовта, Папата предупреди на она што се обидува да ги попречи дури и нашите најдобри напори.
Иако Светиот Дух е силата на вистината, Папата предупреди на „Обвинителот“, „таткото на лагата“, кој се стреми да Му се спротивстави на Бога и да ги сврти луѓето едни против други.
На крајот, папата Лав ги повика верниците да бидат благодарни за безусловната и трајна љубов на Господ и да се доверат на застапништвото на Неговата Мајка, Дева Марија.
Ватикан њуз/к.мк
