Новокрстен католик и две катехуменки кои се подготвуваат да ги примат Светите Тајни на христијанската иницијација ги споделија со „Ватикан њуз“ своите приказни за откривањето на верата. Тие велат дека средбата со папата Лав XIV им влева надеж за иднината на Црквата и на младите во Франција.

Во време кога изгледа дека светот сè повеќе се оддалечува од верата и кога расте бројот на луѓе кои велат дека не припаѓаат на ниту една религија, неколку земји истовремено бележат зголемување на бројот на возрасни кои самите избираат да се крстат и да ја откријат католичката вера.

Една од нив е Франција, каде што повеќе од 13.000 возрасни лица беа крстени за Велигден во 2026 година. Бројот на крштевки се зголеми за 28 проценти во споредба со 2025 година, а во последните десет години е повеќе од тројно зголемен.

Во саботата, некои од овие новокрстени католици и катехумени, односно лица кои се подготвуваат за Светите Тајни на христијанската иницијација, имаа можност да го видат папата Лав XIV за време на неговата посета на Католичкиот институт во Париз (Institut catholique de Paris) на 26 септември, во рамките на неговото апостолско патување во Франција.

„На мојата одлука за преобраќање гледам како на дел од поширок социолошки процес. Денес Црквата во Франција доживува нешто навистина посебно: преминуваме од христијанство што некогаш се наследуваше кон христијанство што се избира“, изјави за „Ватикански вести“ 24-годишниот Робин, кој бил крстен во 2023 година.

„По Втората светска војна во нашето општество постоеше широко распространет стремеж да се изгради општество без Бога, општество рамнодушно кон Бога. Но јасно е дека младите денес не се посреќни. Напротив, тие се дури и понесреќни од порано. И јас сум дел од таа генерација, од таа младина која жеднее за Бога“, рече тој.

Робин: До католичката вера преку свештеници и француската мисла

Робин е студент во Париз. Пораснал во евангелистичко протестантско семејство и е осмо од девет деца.

Тој раскажува дека бил воспитуван во „силна култура на верата, сосредоточена на личниот однос со Христос“.

Она што особено го привлекло во Католичката црква била заедничката димензија на верата.

„Тоа е вера која се живее во заедништво, со Божјиот народ, во Католичката црква во нејзината универзална димензија. Токму тоа длабоко ме допре“, рече тој.

Иако неговото семејство припаѓало на друга христијанска традиција, Робин уште од младоста имал допир со католичката култура. Неговите родители биле активни околу биоетички прашања за кои и Католичката црква покажува силен интерес. Тој учествувал и на кампови организирани од Европските извидници и посетувал голем број цркви и манастири.

„Сепак, католичката вера формално ја прифатив во голема мера благодарение на разговорите со свештеници од парохијата ‘Сен Луј’ во Париз, но и преку многу читање, особено делата на Шарл Пеги, кои силно ме допреа и ме доведоа до местото каде што сум денес“, рече Робин.

Неговото семејство добро ја прифатило одлуката, а денес меѓусебно се охрабруваат во верата.

„Во суштина, и мислам дека тоа е најважното, сите ние и понатаму сме христијани. Немаше некаква радикална промена. Едноставно открив друга христијанска традиција која подлабоко одговараше на она што го барав.“

Робин беше особено радосен што повторно можеше да го види Папата, кого претходно го сретнал за време на Јубилејот на младите во Рим во август 2025 година.

„Да го видиме повторно тука, во Париз, во мојата земја и во нашиот главен град, е навистина голема чест за нас и за Франција, најстарата ќерка на Црквата“, рече тој.

„Кај папата Лав гледам силна посветеност на единството на Црквата и желба да се препознае силата на младите.“

Кристал: Лична порака од Бога и силата на молитвата

Како Робин, и 34-годишната Кристал припаѓа на генерацијата млади возрасни кои бараат подлабока смисла во животот.

Оваа година таа го започнала катехуменатот и се надева дека ќе биде крстена на Велигден во 2027 година.

Нејзината мајка е муслиманка, но Кристал вели дека таа религија никогаш не ја привлекувала.

„Откако придружував една пријателка на молитвена средба, решив да се преобратам“, раскажува таа. „Тој ден побарав од Бога еден многу личен знак. Го добив и токму поради тоа решив да го започнам катехуменатот.“

Нејзината мајка добро ја прифатила одлуката.

„Ми рече дека во секој случај има само еден Бог и дека најважно е човек да се моли. Нејзината реакција беше прилично позитивна“, раскажува Кристал.

Таа признава дека патот кон верата има и моменти на сигурност и моменти на сомнеж. Особено важни за неа се придружувањето од духовниот отец и молитвата.

„Навистина ми значи тоа што некој ме води на овој пат, но пред сè молитвата е она што секојдневно ме придружува и постојано ги смирува моите сомнежи. Таа ме движи напред и ме поддржува на овој пат“, рече Кристал.

Таа се надева дека сегашниот „бран на преобраќања“ нема да биде само привремена појава, туку ќе стане „позитивен поттик за Франција и за нејзината младина“.

Можноста лично да го види Папата, вели таа, е „навистина неверојатна“ и ѝ помага уште подлабоко да навлезе во верата.

Анџелина: „За мене ова е знак дека сум на вистинскиот пат“

Анџелина, исто така 34-годишна, се подготвува да биде крстена на Велигден следната година.

„Навистина го доживувам ова како знак, само неколку месеци пред моето крштевање, дека сум го направила вистинскиот избор“, рече таа за посетата на Папата.

„Навистина сум восхитена. Сега сфаќам дека нема да го гледам само на телевизија, како вообичаено, туку лично.“

Нејзиниот интерес за Католичката црква вера започнал во период кога се соочувала со сложена семејна ситуација.

„Веќе подолго време размислував за тоа, а по тој тежок период почувствував сила конечно да го започнам овој процес. Мојот сопруг ми беше огромна поддршка. Тој ми помогна да се одлучам и да затропам на вратата на црквата во мојот град“, рече таа.

Нејзиниот сопруг е католик, како и нејзините родители, но самата Анџелина никогаш не била крстена како дете.

„Мило ми е што сега, како возрасна личност, можам сама да ја донесам оваа одлука“, вели таа.

На почетокот тешко зборувала со другите за својот духовен пат.

„Воопшто не се осмелував да зборувам за тоа. Бев многу срамежлива. Но потоа открив дека, кога почнав да зборувам, многу луѓе во моето опкружување всушност се католици, само што претходно никогаш не зборувавме за верата.“

За неа, целиот процес бил исполнет со охрабрување и поддршка.

„Откако тргнав по овој пат, се чувствувам многу помирно во секојдневниот живот. Навистина пронајдов духовно семејство. Токму тоа најмногу ме привлече: чувството на заедништво во Црквата и сите средби и настани на кои можеме да учествуваме.“

Анџелина веќе активно учествува во животот на својата парохија и сака тоа да продолжи и по нејзиното крштевање.

Надеж за иднината на француската младина

Во петокот вечерта, папата Лав XIV одржа молитвено бдение со повеќе од 80.000 млади луѓе кои го исполнија стадионот „Стад де Франс“ со радост и ентузијазам.

Меѓу нив беше и новокрстениот Робин.

„Видов една генерација, француска младина која е будна и длабоко ангажирана“, рече тој.

„Тоа ми дава голема надеж за иднината на нашата земја и за иднината на нашата младина.“

Ватикан њуз/к.мк