Светиот Престол ја потврдува посветеноста за поддршка на земјите во развој без излез на море
На Третата меѓународна конференција за земјите во развој без излез на море, што се одржа во Туркменистан, Светиот Престол повикува на солидарност, правда и конкретни акции за искоренување на сиромаштијата и за поттикнување на интегрален човечки развој.
Светиот Престол ја повтори својата непоколеблива посветеност на земјите во развој без излез на море, повикувајќи ја меѓународната заедница да ги поткрепи зборовите со конкретни дела за промовирање на правдата, достоинството и одржливиот раст.
Зборувајќи на Третата меѓународна конференција за земји во развој без излез на море, одржана на 6 август 2025 година во Аваза, Туркменистан, монсињор Арно ди Шејрон де Бомон, шеф на делегацијата на Светиот Престол на Конференцијата, Апостолски нунциј и постојан набљудувач во Обединетите нации, им се заблагодари на земјата домаќин и на оние кои работеле за да се овозможи одржување на собирот. Тој ја опиша конференцијата како „можност за повторно потврдување на поддршката за земјите во развој без излез на море“ и за обезбедување „долгорочна, опиплива помош“ која навистина го поттикнува интегралниот човечки развој.
Сиромаштијата: најитен предизвик
Надбискупот Бомон истакна дека „иако се различни во своите географски, културни и економски контексти“, земјите со низок развој се соочуваат со истите системски предизвици, вклучувајќи „неодржливи долгови, високи трошоци за транспорт и ранливост на климатските промени и надворешните шокови“. Сепак, надбискупот нагласи дека „сиромаштијата останува најголемиот и најитен предизвик“.
Сиромаштијата, продолжи тој, не е само економско прашање, туку „го поткопува и од Бога даденото достоинство на секое човечко битие, со тоа што им ги одзема на милиони луѓе основните потреби“. Особено е тешко во руралните области, каде што основните услуги се оскудни. „Сиромаштијата не е неизбежна“, рече надбискупот, додавајќи дека таа е последица на неправедни структури и политички одлуки и затоа може и мора да се надмине.
Тој, исто така, го привлече вниманието на културната димензија на сиромаштијата, истакнувајќи дека одбивањето на културните права и недостатокот на образовни можности ја продлабочуваат нееднаквоста.
Трговија и правда
Надбискупот Бомон истакна дека клучна пречка за надминување на сиромаштијата во земјите со низок развој е неправедната меѓународна трговија. Цитирајќи го „Caritas in Veritate“, тој потсети дека трговијата, ако е правилно ориентирана, може да биде моќен двигател на развојот. За да се случи тоа, таа мора да биде „обликувана според барањата на правдата и солидарноста“ и заснована на принципот на универзална корист на добрата, осигурувајќи дека сите луѓе ги имаат условите потребни за нивен целосен развој.
Земјите кои се во неповолна положба поради неправедните трговски правила честопати се соочуваат со недостиг на капитал и осакатувачки надворешен долг, што поттикнува неодржлива експлоатација на животната средина и ја продлабочува сиромаштијата. Надбискупот ја нагласи важноста развојот да не се сведува на едноставна размена на производи, туку да биде придружен со пренесување на научно и технолошко знаење, овозможувајќи им на земјите со низок развој да станат автономни и отпорни.
Човечката личност во центарот
Сржта на пораката на надбискупот Бомон е дека „човечката личност мора да остане во центарот на сите стратегии за развој“.
„Трговијата и економскиот раст се средства за промовирање на интегралниот човечки развој на секоја личност и унапредување на општото добро“, продолжи надбискупот.
Завршувајќи го своето обраќање, постојаниот набљудувач на Светиот Престол во Обединетите нации го цитираше папата Лав XIV, потврдувајќи ја трајната мисија на Светиот Престол „да биде во служба на слогата меѓу народите“ и да прошири „непоколеблива солидарност“ кон најпогодените, вклучувајќи ги и „оние оддалечени региони кои не можат да се подигнат од својата пониженост поради рамнодушноста на оние“ кои имаат моќ да помогнат.
Ватикан њуз/к.мк
