Раните дела на папата Лав XIV ќе бидат објавени на англиски јазик под наслов „Слобода под благодатта“
Англиското издание на книгата „Слобода под благодатта“ треба да се појави во септември. Во неа се собрани проповеди, обраќања, пораки и писма што отец Роберт Франсис Превост ги напишал за време на својата служба како генерален приор на Редот на Свети Августин.
Книга со раните јавни списи на отец Роберт Франсис Превост, денешниот папа Лав XIV, за првпат ќе биде објавена на англиски јазик на 15 септември.
Томот, насловен „Слобода под благодатта. Размислувања за духовната традиција што ме обликуваше“, ќе биде објавен од Image Books, издавачка куќа на Penguin Random House Christian Publishing Group.
Книгата првично беше објавена на италијански јазик од Ватиканската издавачка куќа, LEV, под наслов Liberi sotto la Grazia. Во неа се собрани проповеди, говори, пораки и писма од отец Роберт Франсис Превост, кој од 2001 до 2013 година служел како генерален приор на Редот на Свети Августин.
Италијанското издание беше претставено во Рим, во Патристичкиот институт „Августинијанум“, и му беше предадено на папата Лав XIV пред неговото објавување. Томот се преведува и на неколку други јазици.
Книгата ја уредија августинските отци Роко Ронзани, Мигел Анхел Мартин Хуарез и Мајкл Ди Грегорио. Таа нуди увид во мислата и духовноста на човекот кој подоцна ќе стане папа.
Според Кемпбел Вортон, виш потпретседател и издавач во Penguin Random House Christian, „секое поглавје е прозорец кон духовната длабочина и визија на човекот кој на крајот ќе стане папа Лав“.
Тој ја опиша книгата како дело што носи „итна порака за љубов и служба во соочувањето со предизвиците на денешниот свет“.
Според Вортон, „Слобода под благодатта“ е наменета не само за католиците, туку и за секој христијанин или духовен трагач што бара водство и надеж за живот кој го преобразува светот.
За време на презентацијата на италијанското издание во Рим, на 6 мај 2026 година, отец Џозеф Фарел, генерален приор на Редот на Свети Августин, потсети дека насловот доаѓа од Правилото на свети Августин, кое ги поттикнува монасите да живеат „не како слуги под законот, туку како слободни луѓе под благодатта“.
На презентацијата, кардиналот државен секретар Пјетро Паролин истакна дека страниците на книгата откриваат августински теми што се централни во мислата на отец Превост. Меѓу нив се потрагата по Бога, првенството на благодатта, мисијата на Црквата, повикот на сиромашните и потребата Евангелието да се пренесува на јазик разбирлив за современиот свет.
Објавувањето на англиското издание сега ѝ нуди на пошироката читателска публика можност да се сретне со духовните корени, пасторалната визија и мисионерската грижа што ја обележале службата на отец Роберт Франсис Превост пред неговиот избор за папа Лав XIV.
Ватикан њуз/к.мк
