Зборувајќи со новинарите пред Кастел Гандолфо во вторник вечерта, 26 мај 2026 година, папата Лав XIV го обнови својот апел за хуманитарна помош за Газа, предупреди против употребата на вештачка интелигенција во војувањето што го занемарува човечкиот живот и го истакна тековниот дијалог со компанијата за вештачка интелигенција „Антропик“.
Зборувајќи со новинарите пред својата резиденција во Кастел Гандолфо во вторник вечерта, папата Лав XIV уште еднаш ја повика меѓународната заедница да им помогне на луѓето во Газа, инсистирајќи дека човековите права треба да се почитуваат „за сите“.
Одговарајќи на прашање за активистите вклучени во Глобалната флотила „Сумуд“, која се упатува кон Газа, по извештаите дека некои од нив биле врзани со лисици и со превез на очите, Папата рече дека „треба да го обновиме нашиот апел за почитување на човековите права“ на секој човек.
Тој повторно изрази жалост поради континуираното страдање на цивилите во Газа, истакнувајќи дека „за жал, луѓето во Газа сè уште не добиваат хуманитарна помош“. Папата објасни дека таквата состојба „предизвикува протести“, а со тоа и дополнителни компликации, меѓу кои и оние поврзани со Флотилата.
„Исто така, би сакал да го обновам ова не само како повик, туку навистина како апел“, продолжи тој, повикувајќи ги „сите власти да им помогнат и да го придружуваат народот во Газа, како и да помогнат да започне обновата“. „Луѓето навистина страдаат“, рече Папата, додавајќи дека тие „продолжуваат многу да страдаат“.
На прашањето што значи кога невооружени мировни активисти се соочуваат со насилство, папата Лав XIV предупреди на опасноста од поттикнување уште поголема омраза. „Предизвикуваме сè повеќе и повеќе омраза“, рече тој, додавајќи дека „насилството не помага, од која било страна“. Наместо тоа, Папата ја нагласи потребата „да се вратиме на преговорите“ и „преку дијалог да се бара решение на проблемите“, секогаш „почитувајќи ги човековите права на сите“.
„Оружана“ вештачка интелигенција
Папата се осврна и на растечката улога на вештачката интелигенција во современото војување, предупредувајќи против технологии што го оддалечуваат донесувањето одлуки од вредноста на човечкиот живот.
Осврнувајќи се на неодамнешните конфликти, вклучително и оној во Либан, Папата истакна дека денес „се води војна со вештачка интелигенција, без да се размислува за човечките животи, кои се вистинските жртви на сето тоа“.
Имајќи го ова предвид, Папата го обнови својот апел за мир и зборуваше за потребата од спроведување на она што го опиша како „разоружена вештачка интелигенција“.
Дијалог со „Антропик“
Одговарајќи на прашање за тоа како Ватикан планира да продолжи да соработува со големите компании за вештачка интелигенција по објавувањето на неговата неодамнешна енциклика, Папата откри дека дијалогот веќе е во тек.
Тој ја опиша тековната соработка меѓу Дикастеријата за унапредување на интегралниот човечки развој и компанијата за вештачка интелигенција „Антропик“. „Имаше еден вид заедничка работа“, објасни тој, додавајќи дека поканата била упатена вчера од двете страни.
„Мислам дека е многу важно да се продолжи дијалогот и вистински да се бара разоружена вештачка интелигенција“, заклучи Папата.
Ватикан њуз/к.мк
