Папата Лав XIV одговара на писмо на читателка на месечното списание Piazza San Pietro, во кое го осудува фемицидот и повикува на сојуз меѓу училиштата и Црквата за промовирање „култура на почит“ меѓу младите.
Папата Лав XIV одговори на прашање на читателка во мартовскиот број на списанието Piazza San Pietro, објавен на 8 март 2026 година, Меѓународниот ден на жената. Како што обично прави, Папата одговори на писмо во кое читателката бара помош, размислување и насока за актуелна тема. Во мартовскиот број, писмото е потпишано од Џована од Рим. Таа пишува „со насолзени очи“, станувајќи глас на трагедијата на многу жени кои „да сакаат маж, да се омажат за него или да изберат да живеат со него и да создадат семејство“ станува „стапица“.
„Зошто?“, прашува таа. „Како денес да го објасниме насилството, кое станува сè почесто и поболно, што толку многу мажи го вршат врз жените за кои велат дека ги сакаат? Дури и да ги убијат. Брутално, со омраза, како жените да се виновни што повеќе не ги сакаат.“
Одговорот на Лав XIV е долг и промислен и започнува со изразување „голема болка“ што ова прашање ја предизвикува во него: „насилството во односите, а особено насилството врз жените“. Папата го цитира свети Иван Павле II и познатиот израз „женскиот гениј“, кој, според него, треба уште повеќе да се поддржи во соочување со „свет што често е обележан од насилни начини на мислење“.
„Жените се протагонистки и создателки на култура на грижа и братство, која е неопходна за да му се даде иднина и достоинство на целото човештво“, вели Папата. „Можеби и затоа“ тие денес се мета на насилство, „погодени и убиени“, затоа што „се знак на противречност во ова збунето, несигурно и насилно општество“, бидејќи нè упатуваат кон вредности на вера, слобода, еднаквост, плодност на животот, надеж, солидарност и правда.
Тоа се „големите вредности“ на кои, според Папата, им се спротивставува „опасен менталитет“ што ги труе односите и раѓа себичност, предрасуди, дискриминација и желба за доминација.
Папата потсети дека во својата проповед за Педесетница минатата година, на 8 јуни, по повод Јубилејот на движењата, го осудил ставот што често води до насилство, што, за жал, го потврдуваат бројните и неодамнешни случаи на фемицид. „Насилството, секое насилство, е граница што ја дели цивилизацијата од варварството“, нагласува Папата.
Тој потсетува дека никогаш не смее да се потценува ниту еден чин на насилство и дека не треба да се плашиме да го пријавиме, вклучително и во средини каде што се минимизира или се негира одговорноста.
Папата вели дека го допрел и повикот на Џована да се работи „од темел“ врз културата и воспитувањето на младите, за да се изгради почит кон жените и воопшто кон секој друг, особено кон оние што се различни од нас. Според читателката на списанието, чиј главен уредник е отец Енцо Фортунато, тоа е задача што училиштето и Црквата можат да ја извршуваат заедно:
„Кој, ако не училиштето и Црквата, може да им помогне на новите генерации, ширејќи култура на почит, љубов и пред сè слобода? Порака што ќе учи никогаш да не се гледа жената како предмет што треба да се поседува…“
Затоа Џована повикува на „сè посилно образовно сојузништво“, а Папата ја повторува неговата апсолутна неопходност: „Да чекориме заедно, во меѓусебна почит кон нашата заедничка човечност, не е сон, туку единствената можна реалност за да се изгради светлина за сите“, пишува тој.
Црквата, заедно со семејствата, училиштата, парохиите, движењата и здруженијата, монашките заедници и јавните институции, може да ја сподели итноста за развивање конкретни проекти за спречување и запирање на насилството врз жените.
Оттука произлегува и нов апел, по оној од 25 ноември, Меѓународниот ден за елиминација на насилството врз жените, „да се запре насилството“, почнувајќи од „воспитувањето на младите“ и обидувајќи се „да се отворат срцата на сите“ за да се признае дека секој човек заслужува почит и достоинство, „и мажите и жените, сите“.
„Мора да го искорениме ова насилство“, заклучува Папата, „и да бараме начини како да го преобразиме нашиот начин на мислење. Треба да бидеме луѓе на мирот, кои се грижат за сите.“
Ватикан њуз/к.мк
