Папата Лав XIV ги охрабри водачите на црковните движења и лаичките здруженија да ги водат оние што им се доверени со проникливост и транспарентност, за да останат отворени кон светот и втемелени во заедништвото.
Папата Лав XIV во четврток, 21 мај 2026 година, се сретна со учесниците на состанокот на модераторите на здруженијата на верниците, црковните движења и новите заедници, промовиран од Дикастеријата за мирјани, семејство и живот.
Во своето обраќање, Папата се осврна на управувањето во Црквата, истакнувајќи дека раководењето со секоја организација е клучно за нејзиниот успех и трајност.
Управувањето, рече тој, подразбира давање „сигурна насока, така што заедницата може да биде место на раст за луѓето што ѝ припаѓаат“.
Во Црквата, раководењето надминува координирање на практични прашања и станува израз на Божјата спасоносна волја во Христос.
Папата Лав забележа дека управувањето со мирјанските здруженија им е доверено на мирјани од нивните заедници, кои ги избираат слободно.
Потоа тој посочи на три последици од примањето на овој дар на Светиот Дух од страна на водачите.
Раководењето, рече тој, треба да биде во полза на целата заедница, а не на личните интереси. Тоа никогаш не смее да се наметнува, туку треба да биде препознаено и слободно прифатено.
Потоа додаде дека, водството во Црквата е харизма што треба да се остварува во координација со епископите и да биде подложена на нивното расудување.
„Одредени карактеристики секогаш треба да бидат присутни во управувањето: меѓусебно слушање, заедничка одговорност, транспарентност, братска блискост и заедничко расудување“, рече Папата. „Исто така, би сакал да потсетам дека доброто управување, наместо сè да концентрира околу себе, промовира супсидијарност и одговорно учество на сите членови на заедницата.“
Потоа папата Лав се осврна на пророчката улога на водачите мирјани во Црквата, истакнувајќи дека тоа бара слушање на актуелните пасторални потреби, за да може да се одговори на новите предизвици.
„Припадноста“, рече тој, „е автентична и плодна кога го надминува учеството во внатрешните активности на групата, ги толкува знаците на времето и се отвора кон надвор, за сите луѓе, за културата на времето и за полињата на мисија што сè уште не се истражени.“
Истовремено, мирјанските здруженија и црковните движења се повикани да го прифатат заедништвото меѓу себе и со универзалната Црква.
Говорејќи непосредно, папата Лав истакна дека некои групи ја прифаќаат идејата дека нивната харизма е единствената автентична. Сепак, предупреди тој, црковните движења треба да живеат во заедништво со целата Црква и со својот локален епископ, дури и кога постојат несогласувања.
Враќајќи се на подготвените забелешки, Папата рече дека црковните водачи треба да слушаат различни мислења, културни контексти и лични темпераменти, стремејќи се да го зачуваат „повисокото добро на заедништвото“.
Папата Лав XIV ги повика водачите мирјани да сведочат со кротост, непристрасност и несебична љубов, изразувајќи ја основачката харизма на своите движења.
„Секоја автентична харизма веќе во себе вклучува верност и отвореност кон Црквата“, рече тој.
На крајот, Папата ја пофали работата и историјата на мирјанските здруженија и црковните движења, велејќи дека од нив произлегле многу добро оформени луѓе и успешни евангелизатори.
„Чувајте ги и, со Божјата милост, помогнете им на сите овие дарови да растат!“, заврши тој. „Црквата ве поддржува и ве придружува.“
Ватикан њуз/к.мк
