Папата Лав XIV на Генералната аудиенција: Мораме итно да ги заштитиме семејствата и бракот
На првата Генерална аудиенција по операцијата, папата Лав XIV им се заблагодари на сите за молитвите и размислуваше за улогата на семејството како темел на општеството, нагласувајќи ја важноста на брачната врска и дарот на раѓањето деца.
„Првото нешто што би сакал да ви го кажам е: ви благодарам! Ви благодарам за поддршката преку вашите молитви. Му благодарам на Бога за Неговата великодушност. Сите да ја обновиме нашата доверба во Божјата добрина и милосрдие“, рече папата Лав XIV на плоштадот „Свети Петар“, за време на својата прва Генерална аудиенција по операцијата.
Папата Лав XIV беше отпуштен од римската болница „Џемели“ во саботата, 17 октомври, по петдневен престој во болницата по операцијата на белите дробови извршена на 13 октомври.
Семејството е темел на општеството
Папата Лав го продолжи циклусот катехези посветени на документите од Вториот ватикански собор, осврнувајќи се на Пасторалната конституција Gaudium et spes од 1965 година, чие име значи „Радост и надеж“, посветена на Црквата во современиот свет.
Оваа недела тој се задржа на бракот и семејството, нагласувајќи ја потребата тие да бидат заштитени и поддржани, бидејќи имаат суштинско значење за општеството.
Учењето на Gaudium et spes за бракот и семејството ја нагласува „општествената улога на семејството“, кое е определено како „училиште на побогата човечност“ и „темел на општеството“. Документот ги повикува „сите оние што имаат општествени одговорности, особено во политичката и културната сфера“, да ја исполнат својата должност и „делотворно да работат за доброто на бракот и семејството“, истакна Папата.
„Оваа задача денес е поитна од кога било“, рече тој.
Благосостојбата на општеството е поврзана со бракот и семејството
Во својата катехеза папата Лав нагласи дека Црквата е целосно свесна за вредноста и важноста на семејството, потсетувајќи на пасторалната грижа што различни Папи ѝ ја посветувале на оваа тема.
Во тој контекст го спомена и неодамнешниот собир што го свика во Ватикан по повод десетгодишнината од објавувањето на Апостолскиот поттик Amoris laetitia на папата Фрањо. Настанот се одржа од 7 до 14 октомври на кој присуствуваа поглаварите на Источните цркви и претседателите на епископските конференции.
Осврнувајќи се на Пасторалната конституција Gaudium et spes, папата Лав XIV забележа дека во делот од документот посветен на „најитните современи прашања“ значајно место им е дадено токму на бракот и семејството, бидејќи „благосостојбата на поединецот и на човечкото и христијанското општество е тесно поврзана со здравата состојба на брачната и семејната заедница“.
Брачните другари стануваат едно
Gaudium et spes, објасни Папата, нуди обновено разбирање на бракот како „интимна заедница на брачен живот и љубов“, заснована врз „човечкиот чин со кој брачните другари меѓусебно се даруваат и прифаќаат“.
Взаемното самодарување на мажот и жената, преку кое „тие повеќе не се двајца, туку едно тело“, претставува темел на барањето за „целосна верност“ и „нераскинливо единство“ на сопружниците, а свој жив израз наоѓа во раѓањето и воспитувањето на децата, продолжи Папата.
Тој потсети дека сопружниците се повикани да се љубат еден со друг онака како што Христос ја љуби Својата Црква.
Потоа се задржа на брачната љубов, нагласувајќи дека таа „не се ограничува само на еротската привлечност, иако ја вклучува и неа“.
Брачната љубов „ја опфаќа целата волја на сопружниците, ги оживува чувствата во нивните срца и се изразува преку чувства и гестови на нежност“, рече Папата.
Таквата љубов целосно ги опфаќа мажот и жената, „кои се еднакви по достоинство“, проникнува во целиот нивен живот и се изразува преку „дела што му се својствени исклучиво на бракот“. Оваа „единствена интимност“, додаде тој, поттикнува меѓусебно самодарување.
Одговорност за пренесувањето на животот
Папата потоа нагласи дека плодноста на бракот се изразува преку дарот на раѓањето деца.
„Пренесувајќи го и воспитувајќи го човечкиот живот, кој никогаш не смее да биде отфрлен, брачните другари стануваат ‘соработници со љубовта на Бога Создателот и, на некој начин, нејзини толкувачи’“, рече тој.
Родителите се повикани да бидат „водени од правилно расудување во однос на сопственото добро и доброто на своите деца“, со Божја помош и со совест што се придржува кон „Божјиот закон“, како што Црквата го толкува во светлината на Евангелието.
Папата Лав потоа нагласи дека „кога се поставува прашањето за усогласување на брачната љубов со одговорното пренесување на животот“, мора да се „зачува целосната смисла на меѓусебното самодарување и човечкото раѓање во контекст на вистинската љубов“.
Тоа значи дека „од моментот на зачнувањето, животот мора да се чува со најголема грижа“, отфрлајќи ги абортусот и чедоморството. Воедно, „делата својствени на брачната љубов, извршени во согласност со вистинското човечко достоинство, треба да се почитуваат со голема почит“, објасни Папата.
На крајот папата Лав XIV се помоли Светото семејство од Назарет „да нè просветлува на нашиот пат и да ги заштитува семејствата ширум светот“.
Претставници од Малта на Генералната аудиенција
Меѓу присутните на Генералната аудиенција беше и Франк Замит, амбасадор на Малта при Светиот Престол, кој ја придружуваше малтешката министерка за локална самоуправа и јавни работи, Алисон Зерафа Чивели.
Со нив беа и шесте регионални претседатели, како и сите 68 градоначалници од Малта и Гозо, кои присуствуваа на аудиенцијата и се сретнаа со Папата.
Ватикан њуз/к.мк
