По повод 500-годишнината од раѓањето на големиот композитор и органист Џовани Пјерлуиџи да Палестрина, Папата Лав XIV ги прими членовите на Фондацијата „Доменико Бартолучи“ и хорот кој го исполни неговото дело – музика што и денес го збогатува литургискиот живот на Црквата.
Почит кон мајсторот на сакралната музика
Во своето обраќање, Светиот Отец му оддаде чест на Џовани да Палестрина – еден од највлијателните композитори во историјата на црковната музика – опишувајќи ја неговата музика како безвременски израз на молитва и духовно заедништво.
Настанот се одржа во Сала Реџа на Апостолската палата, а во негови рамки беше претставена и пригодната поштенска марка издадена по повод „Палестринијанскиот век“.
„Неговите композиции – возвишени, строги и вдахновени од грегоријанскиот напев,“ рече папата Лав, „ги поврзуваат музиката и литургијата на начин што ја издигнува душата и дава глас на Божјото таинство.“
Музиката како молитва и знак на единство
Потсетувајќи на значајната улога на Палестрина за време на Контрареформацијата, Папата истакна дека токму преку музиката тој придонел кон духовната обнова на Црквата.
„Полифонијата не е само музичка техника“, рече тој, „туку и теолошки набиен израз. Таа го обликува светиот текст во соодветна мелодија, за да го допре срцето на верникот.“
Опишувајќи како повеќе гласови, секој со свој мелодиски тек, се испреплетуваат во хармонична игра – понекогаш се судираат, понекогаш се разрешуваат – Папата заклучи: „Ова динамично единство во различноста е метафора за нашето заедничко патување во верата, под водство на Светиот Дух.“
Живо предание на сакралната убавина
Папата Лав ја истакна „Миса Папае Марчели“ како врвно дело на светата полифонија, оддавајќи признание и на кардиналот Доменико Бартолучи, „незаборавниот маестро“ кој, како директор на хорот на Систинската капела речиси пет децении, го продолжи и збогати ова богато наследство.
Осврнувајќи се на учењата на Вториот ватикански собор, Светиот Отец ги поттикна верниците на полно, свесно и активно учество во литургискиот живот, нагласувајќи дека „кога сакралната музика е вдахновена од верата и обликувана со уметничка вештина, таа ги ангажира гласот, умот и срцето – и станува пат кон молитвата.“
Да пееме и да одиме
Во завршните зборови, Папата им се заблагодари на членовите на фондацијата, на хорот и на сите присутни, повикувајќи се на мислата на Свети Августин: „Пејте, но одете! Не скршнувајте од патот. Не се враќајте назад. Не застанувајте.“
Со овој повик, Папата Лав ги охрабри сите да го прифатат духот на молитвената убавина, особено во контекстот на Јубилејната година, истакнувајќи дека сакралната музика не е само реликт од минатото, туку жив дар кој и денес ја храни и обновува Црквата.
„Да пееме и да одиме“, заврши Папата. „Да градиме мостови на убавина и вера.“
Ватикан њуз/к.мк
