Папата Лав XIV ги повика Колумбовите витези да бидат „пророци на хармонијата“, поттикнувајќи единство преку дијалог и служење на оние на кои им е најпотребна помош преку дела на милосрдие.
Папата Лав XIV ги охрабри Колумбовите витези да бидат „пророци на хармонијата“, градејќи мостови и промовирајќи помирување во свет што сè повеќе е обележан со поделби.
Апелот го упати во видеопорака до учесниците на 144. Врховна конвенција на Редот, што се одржа во Денвер, Колорадо, на 4 август 2026 година.
Поздравувајќи ги присутните, како оние што учествуваа лично, така и оние што се вклучија виртуелно, папата Лав XIV се осврна на темата на собирот: „Во Едниот, ние сме едно“, како и на доблестите на единството и милосрдието, два основни принципа на Колумбовите витези.
Единството мора да се негува
Потсетувајќи на Исусовата молитва на Последната вечера, неговите ученици „сите да бидат едно“, Папата нагласи дека единството е дар доверен на секоја генерација верници.
„Зачувувањето на единството честопати не е лесно и не може да се зема здраво за готово“, рече тој. „Тоа мора активно да се негува преку искрен и понизен дијалог.“
Затоа папата Лав XIV ги охрабри витезите да сведочат за хармонијата што ја посакува Христос, почнувајќи од своите семејства и парохии, а потоа и во пошироките заедници во кои живеат и служат.
„Во време што премногу често е обележано со поделби и остра реторика, постои голема потреба од пророци на хармонијата, кои се стремат да градат мостови и, секогаш кога е можно, да придонесуваат за помирување на спротивставените ставови“, рече Папата.
Милосрдието го зајакнува заедништвото
Осврнувајќи се на милосрдието, Светиот Отец истакна дека делата направени за оние што се во потреба можат сами по себе да станат пат кон единство.
„Кога се трудиме да им помогнеме на оние што имаат потреба, честопати се развива одредена согласност меѓу оние што даваат и оние што примаат, како и меѓу оние што работат заедно за да им помогнат на своите браќа и сестри“, рече тој.
„Така, милосрдието станува одговор на човечкото страдање и силно средство за поттикнување братство и зајакнување на заедништвото што е во срцето на христијанскиот живот.“
Служење на оние што се на маргините
Папата Лав XIV ги пофали Колумбовите витези за продолжувањето на мисијата започната од нивниот основач, блажениот Мајкл Мекгивни.
Повеќе од еден век, забележа тој, Редот работи на тоа да ја покаже Христовата љубов „кон неродените, идните мајки, прогонуваните христијани, жртвите на војната и трговијата со луѓе, сиромашните и ранливите, како и кон оние што живеат на маргините на општеството“.
Преку иницијативите на локалните совети, како и преку националните и меѓународните активности, додаде Папата, „безброј луѓе имале корист“ од дарежливоста на Редот.
„Од моја страна, изразувам голема благодарност за постојаната дарежливост на вашиот Ред кон помалку среќните и верувам дека вашите напори ќе продолжат да носат плодови и во годините што доаѓаат“, рече Папата.
На крајот од својата порака, папата Лав XIV ја довери работата на Врховната конвенција на застапништвото на Марија, Мајката на Црквата, и на блажениот Мајкл Мекгивни.
Потоа го даде својот апостолски благослов на сите членови на Колумбовите витези и на нивните семејства.
Ватикан њуз/к.мк
