Папата Лав XIV ја нагласи важноста на читањето и размислуваше за три збогатувачки аспекти на книгите за време на средбата со членовите на Ватиканската издавачка куќа (LEV) во Ватикан. Тој потсети дека читањето придонесува за „негување на свесно и добро формирано критичко чувство“ и штити од фундаментализам и идеолошки поедноставувања.
„Во овие сто години активност, Ватиканската издавачка куќа им служела на девет папи, ширејќи го нивното учење како придонес за навестување на Евангелието низ целиот свет.“
Со овие зборови папата Лав XIV изрази благодарност за време на средбата со членовите на Ватиканската издавачка куќа во Ватикан, во четврток, 7 мај 2026 година.
Истакнувајќи дека средбата ја одбележува стогодишнината од издавачката куќа, Светиот Отец го опиша настанот како еден вид „семејна прослава“.
Папата потсети дека во 1926 година Ватиканската издавачка куќа станала независна од многу постарата Ватиканска печатница, основана во 1587 година.
Потоа понуди три кратки размислувања за важноста на книгите и читањето.
Книгите како можност за размислување
Најнапред, Светиот Отец рече дека книгите нудат можност за размислување. Особено во дигиталното доба, истакна тој, физичкото присуство на книгата ги потсетува луѓето на важноста на размислувањето, созерцанието и учењето.
„Читањето“, рече Папата, „го храни умот“ и „помага во развивањето на свесно и добро формирано критичко чувство, штитејќи од фундаментализам и идеолошки поедноставувања“.
Поради оваа причина, папата Лав ги охрабри сите да читаат книги „како противотров на затвореноста на умот, која се одразува во крути ставови и ограничени погледи на реалноста“.
Книгите како можност за средба со другите
Потоа Папата размислуваше за книгите како можност за средба со другите.
„Кога држиме книга во рацете“, забележа тој, „на некој начин се среќаваме со нејзиниот автор. Истовремено, се среќаваме и со оние што ја прочитале пред нас, со оние што ја читаат сега и со оние што ќе ја читаат во иднина.“
Тој истакна дека писателите и читателите сè повеќе имаат можности да се здружуваат, да разговараат и да се слушаат едни со други.
Потсетувајќи на честото нагласување на папата Фрањо за „културата на средба“, папата Лав посочи дека книгите служат како мостови кон другите, поттикнуваат дијалог, го збогатуваат разбирањето и ги прошируваат перспективите.
Книгите како можност да се навестува Христос
На крајот, папата Лав нагласи дека за христијаните книгите се и можност да се навестува Христос.
„Добро знаеме како читањето биографија на светец или добро претставено духовно размислување може да го допре срцето“, рече тој.
Папата се осврна и на уметничките прикази што ги поврзуваат светците и светите текстови.
„Дева Марија“, истакна тој, „често е прикажана во сцените на Благовештението како чита Свето писмо. Свети Антониј од Падова е прикажан како ја држи отворена Книгата на Евангелијата, врз која стои Детето Исус. Свети Августин често е прикажан како седи на биро пред голема книга и понекогаш држи срце во раката: вистина и милосрдие.“
Да се храниме со Божјото слово
„Во училиштето на Марија и светците“, рече Папата, „да се храниме со Божјото слово, за да го обликува нашиот начин на размислување и делување“.
Папата Лав ги повтори и зборовите што папата свети Павле VI ѝ ги упати на Ватиканската издавачка куќа во 1976 година, за време на прославата на нејзината педесетгодишнина.
Павле VI, потсети тој, ги охрабрил нејзините членови да „гледаат напред, кон усовршување на идеите и програмите за иднината“.
На крајот, папата Лав им се заблагодари на присутните за нивната посветена и ревносна работа и им го даде својот апостолски благослов.
Ватикан њуз/к.мк
