Објавен е Рескрипт, потпишан од префектот на Секретаријатот за економија и одобрен од Папата, со кој се воведуваат новини за татковско отсуство, права на родители на деца со потешкотии или во состојба на тешка попреченост, како и за доделување на семејни додатоци.
Пет дена платено отсуство за вработените во Ватикан по повод раѓање на дете; три дена месечно платено отсуство за родители на деца со попреченост. Ова се две од новите одредби содржани во Рескриптот објавен на 11 август 2025 година, кој ги проширува заштитите и правата на вработените во Државата Град Ватикан во повеќе области. Документот, потпишан од префектот на Секретаријатот за економија, Максимино Кабалјеро Ледо, е одобрен од Лав XIV, кој на 28 јули го прими Кабалјеро, а тој му ги претстави на Папата одлуките на Советот на УЛСА, тело составено од претставници на различни институции на Светиот Престол и на Управата.
Меѓу новините во Рескриптот – кој менува одредени параграфи од Единствениот текст за поволности во корист на семејството и од Нормите за доделување на семеен додаток – прво се издвојува онаа што се однесува на татковското отсуство. „Вработениот има право на пет дена платено отсуство по повод раѓање на дете“, се вели во документот. „Петте дена отсуство, кои се сметаат за работни денови, може да се искористат континуирано и/или поделено по цели денови, а не по часови, во рок од триесет дена од раѓањето на детето, во спротивно правото престанува.“ На таткото-работник за тие пет дена отсуство му следува „економски надомест во висина од 100% од платата, сметан за сите ефекти поврзани со работниот стаж“.
Семејства со деца со попреченост
За семејствата со деца со попреченост „во утврдена состојба на тежина“ се предвидува дека „родителите, наизменично, имаат право секој месец на три дена платено отсуство, кое може да се користи и континуирано, под услов детето да не е постојано хоспитализирано во специјализирани установи“. „Со цел да се овозможи поголема достапност на време за грижа за членот на семејството со попреченост“, одобрувањето на овие отсуства – освен во случаи дозволени од надлежната власт – подразбира за вработениот „неможност за вршење друга работна дејност“, а евентуално дадената дозвола за таква дејност треба да се укине.
Клиничката проценка на попреченоста и на степенот на неговата тежина, како што се прецизира во Рескриптот, ја врши Лекарска комисија, врз основа на проценителни табели издадени од Високата власт по предлог на Дирекцијата за здравство и хигиена на Управата. Оценката на таа Комисија е „неприкосновена“.
На член од семејството на кое Лекарската комисија го признала како попреченост во тешка состојба или како работно неспособно му следува семеен додаток. На тоа имаат право и носителите на директна, индиректна или наследна ватиканска пензија, признати како работно неспособни или со тешка попреченост од Лекарската комисија.
Семејни додатоци
Во однос на семејните додатоци, Рескриптот појаснува дека на нив имаат право семејствата со „законски деца или изедначени со нив, постари од 18 години“; ако се студенти, „во периодот на средно образование до најмногу навршени 20 години“ или „за целото времетраење на универзитетските студии или студии признаени како еквивалентни од Светиот Престол, до најмногу навршени 26 години“. Овие студии треба да се потврдат со уверение за запишување издадено од универзитетот.
Ватикан њуз/к.мк
