Папата Лав XIV им се обрати на група нерезидентни амбасадори акредитирани во Светиот Престол и ја изрази својата желба нивната мисија „да го зајакне дијалогот, да го продлабочи меѓусебното разбирање и да придонесе за мирот што е толку потребен во нашиот свет“.
„Ниту една нација, ниту едно општество, ниту еден меѓународен поредок не може да се нарече праведен и хуман ако го мери својот успех исклучиво според моќта или просперитетот, а ги занемарува оние што живеат на маргините. Всушност, Христовата љубов кон најмалите и заборавените нè поттикнува да го отфрлиме секој облик на себичност што ги остава сиромашните и ранливите невидливи.“
Ова го изјави папата Лав XIV во четврток наутро, 21 мај 2026 година, во Ватикан, обраќајќи им се на новите нерезидентни амбасадори од Сиера Леоне, Бангладеш, Јемен, Руанда, Намибија, Маврициус, Чад и Шри Ланка, акредитирани во Светиот Престол, по повод предавањето на нивните акредитивни писма.
Светиот Отец ги замоли да им ги пренесат неговите срдечни поздрави на своите шефови на држави, заедно со уверувањето дека се моли за нив и за нивните сограѓани.
Визија за дипломатско единство
Папата рече дека е особено задоволен што ги прима додека Црквата се приближува кон празникот Педесетница, потсетувајќи дека Светиот Дух слезе врз учениците, преобразувајќи го стравот во храброст, а поделбата во единство, и овозможувајќи им да зборуваат на јазиците на сите народи.
„Се надевам“, рече Папата, „дека слична визија за единство може да го инспирира светот на дипломатијата, каде што конструктивните односи меѓу народите цветаат преку вистинска отвореност, негување меѓусебна почит и споделено чувство на одговорност.“
Клуч за надминување на недоразбирањата и враќање на довербата
Во тој поглед, Папата рече дека сака да го обнови апелот што го упати кога им се обрати на членовите на дипломатскиот кор на почетокот на јануари.
„Во време кога ‘мирот се бара преку оружје како услов за потврдување на сопствената доминација’“, повтори тој, „постои итна потреба за враќање кон ‘дипломатија што промовира дијалог и бара консензус’ на сите нивоа: билатерално, регионално и мултилатерално.“
„Таквиот дијалог, мотивиран од искрена потрага по патишта што водат кон мир“, рече тој, „бара зборовите повторно да изразуваат јасни реалности, без искривување или непријателство.“
Само така, подвлече папата Лав, може да се надминат недоразбирањата и да се обнови довербата во меѓународните односи.
Дијалогот бара промена на срцето
Иако учтивиот и јасен дијалог е од суштинско значење, рече Папата, тој „мора да биде придружен со подлабоко преобраќање на срцето: подготвеност да се остават настрана одредени интереси заради општото добро“.
Папата Лав предупреди дека ако успехот се мери исклучиво според моќта и просперитетот, а се занемаруваат оние што се на маргините, ниедна нација, општество или меѓународен поредок не може вистински да се нарече праведен и хуман.
Тој нагласи дека Христос, со Својата љубов кон заборавените, нè повикува да ги отфрлиме сите облици на себичност што ги оставаат ранливите и сиромашните невидливи.
Зајакнување на меѓународните организации
Папата рече дека токму овој дух на солидарност треба да ја оживува службата на дипломатите и да ги зајакнува меѓународните организации, за да се создаваат можности за средба и посредување.
„Овие институции“, продолжи тој, „остануваат неопходни инструменти за решавање спорови и поттикнување соработка. Во момент кога геополитичките тензии продолжуваат дополнително да го фрагментираат нашиот свет, потребно е да бидат порепрезентативни, поефикасни и ориентирани кон единството на човечкото семејство.“
Вреден мост на доверба и соработка
Папата им се заблагодари на амбасадорите за нивната служба, која, како што нагласи, „претставува вреден мост на доверба и соработка“ меѓу нивните земји и Светиот Престол.
Тој се помоли нивните „заеднички напори да придонесат за обновена посветеност на билатералниот и мултилатералниот ангажман и да помогнат вниманието да се насочи кон оние што често се заборавени на маргините на нашите општества“, за да можат „заедно да работат на поставување поцврсти темели за поправеден, побратски и помирен свет“.
Придонес кон многу потребниот мир
Папата ги увери новите амбасадори во подготвеноста на Државниот секретаријат, заедно со дикастериите на Римската курија, да им помогне додека ги преземаат своите нови одговорности.
„Нека вашата мисија“, рече тој, „го зајакне дијалогот, го продлабочи меѓусебното разбирање и придонесе за мирот што е толку потребен во нашиот свет.“
Ватикан њуз/к.мк
