Молитвената накана на епископот Стојанов за април 2025 година е посветена за зајакнување на верата во воскресението
Живееме во свет, во кој многу работи се оспоруваат, па така и воскресението. А ние христијаните во символот на верата, сепак исповедаме: го чекам воскресението на мртвите и животот во идниот век. Воскресението не е само настан од минатото, туку реалност која и денес го преобразува нашиот живот. А овој период од литургиската година е прекрасна можност, да размислиме дали вистински веруваме во Божјото ветување, во Воскресението и вечниот живот?
Во Стариот завет наоѓаме знаци кои не упатуваат на воскресението. Пророкот Јона беше три дена и три ноќи во утробата на китот, а потоа Бог го врати во живот и на неговото послание (Јона 2,1-11). Овој настан е праслика на Христовото тридневно пребивање во гробот и Неговото славно воскресение.
За важноста на воскресението јасно ни зборува свети Павле во неговото Прво послание до Коринтјаните, каде вели: „Ако, пак, Христос не е воскреснат, тогаш празна е нашата проповед, празна е и вашата вера“ (1 Коринтјаните 15,14). Без верата во воскресението нема вистинска вера, нема и надеж за вечен живот.
Во овој месец, кога преку литургиските обреди на Црквата ќе ги доживееме страдањата, смртта и воскресението на Христа, да молиме Господ да ја зацврсти нашата вера во воскресението и да ни даде сила и храброст, радосно и гласно да сведочиме за славното Христово воскресение!
к.мк
