Кардинал Паролин: Разговорите за прекин на огнот меѓу Украина и Русија нека донесат праведен, траен мир
Кардиналот државен секретар Пјетро Паролин зборува пред новинарите за апелот на Папата за разоружување и повикува на отвореност во дијалогот за ставање крај на војната во Украина. На новинарско прашање дали кардиналот Паролин и папата Фрањо разговарале за можноста за негово повлекување, кардиналот одговори: „Дефинитивно не“.
„Кога ќе се случи повторно вооружување, порано или подоцна, оружјето мора да се користи, нели?
Државниот секретар на Ватикан, кардиналот Пјетро Паролин, ја понуди таа оценка за неодамнешниот обид на неколку европски нации да се вооружат, бидејќи меѓународните односи се соочуваат со длабока промена.
Кардиналот Паролин разговараше со новинарите во понеделникот вечерта, 17 март 2025 година, на маргините на настанот организиран од Мароканската амбасада при Светиот Престол насловен „Рамазанската трпеза – Ифтар“.
Запрашан за планот за повторно вооружување на Европа, кардиналот истакна дека Светиот Престол повика уште од Првата светска војна на „општо и контролирано разоружување“.
„Затоа“, додаде тој, „не можеме да бидеме задоволни од правецот во кој се движат работите“.
Кардиналот, исто така, одговори на прашањето за разговорите за прекин на огнот меѓу Русија и Украина, истакнувајќи дека изгледа Русија поставила одредени услови, „особено во однос на верификацијата на усогласеноста со прекинот на огнот“. „Се надеваме дека нема да се наметнат никакви предуслови што ќе го спречат започнувањето на дијалогот“, рече тој.
Кардиналот Паролин ја изрази поддршката на Светиот Престол за разговорите и надежите дека тие ќе доведат до понатамошни преговори кои можат да „донесат крај на војната и да воспостават праведен и траен мир за кој долго се надевавме“.
„Бидејќи Украина конечно ја изрази својата волја“, рече тој, „се надеваме дека ќе има волја и од другата страна да го иницира овој прекин на огнот“.
Во врска со здравјето на папата Фрањо, државниот секретар ги повика сите „да се информираат од медицинските билтени, бидејќи тие даваат точни информации за состојбата на Папата“.
Кардиналот Паролин истакна дека се сретнал со Папата минатата недела, велејќи дека го нашол во подобра состојба од првиот пат кога го посетил. За време на тие посети, рече тој, Папата нуди свое водство за „прашања и проблеми кои бараат решение“.
Како одговор на новинарско прашање дали кардиналот Паролин и папата Фрањо разговарале за можноста за негово повлекување, кардиналот одговори: „Дефинитивно не“.
Ватикан њуз/к.мк
