Здравјето на папата Фрањо останува стабилно и добро е расположен, соопшти Канцеларијата за печат на Светиот Престол во вторник, 1 април 2025 година.
Крвната слика на Папата е нормална, а во меѓувреме напредокот може да се види во неколку детали, се наведува во извештајот. Рендгенските снимки од пред неколку дена покажуваат подобрување на воспалителната слика на белите дробови. Со терапијата е подобрена моториката, дишењето и гласот на Папа, а главно ноќе и по потреба добива кислород преку назални цевки.
Во домот Санта Марта, каде што престојува по отпуштањето од болница, Светиот Отец продолжува да работи, седејќи на своето биро. Секое утро слави света Литургија во капелата на вториот кат. Согласно лекарската препорака тој се уште не прима посетители, освен здравствениот персонал и најблиските соработници.
Се уште не се објавени детали за обредите во Светата седмица. Од Канцеларијата за печат на Светиот Престол забележуваат дека се уште е рано за тоа. Се уште не е јасно до кој степен самиот Папа ќе ги предводи обредите. Понови информации, особено во врска со Ангел Господов, ќе бидат доставени до новинарите за време на следниот брифинг кој ќе се одржи во Канцеларијата за печат на Светиот Престол во петок, на 4 април. Папата нема да учествува на светата Литургија за јубилејот на болните во недела, 6 април. Според информациите објавени од Канцеларијата за печат на Светиот Престол, светата Литургија ќе ја предводи префектот на Дикастеријата за евангелизација, надбискупот Рино Физикела, кој ќе ја прочита проповедта подготвена од Папата.
Ватикан њуз/к.мк
