Сега е официјално: агроволтаичната електрана на Ватикан, на локацијата на Ватиканското радио северно од Рим, може да започне со работа. Барем од правен аспект, веќе нема пречки за тоа.
Договорот меѓу Светиот Престол и Италија, потпишан на 31 јули минатата година, стапи во сила во среда 27 мај 2026 година. Еколошката централа во Санта Марија ди Галерија, во близина на езерото Брачано, е предвидено со текот на времето да ги задоволи сите енергетски потреби на Ватикан. Сепак, во ватиканското соопштение не се наведува до каде е напредната изградбата.
Агроволтаичните системи ја комбинираат употребата на фотоволтаични панели со земјоделско производство: зеленчук и житни култури растат под сончеви панели поставени на носачи. На долг рок, агроволтаичниот систем во Санта Марија ди Галерија треба не само да ја снабдува со електрична енергија преносната инфраструктура на Ватиканското радио, туку и да обезбеди климатски прифатлива енергија за целата територија на Ватиканската држава.
Ова го одреди папата Фрањо во јуни 2024 година, кога го започна проектот со мотото Fratello Sole.
Областа е десет пати поголема од Ватикан
Во својата енциклика Laudato si’ од 2015 година, папата Фрањо повика на поголема посветеност на обновливите извори на енергија. „Во светот, чистите и обновливите извори на енергија се развиваат само во ограничена мера“, напиша тој. Папата Лав XIV го продолжи курсот на својот претходник по ова прашање, а во јуни ја посети оваа локација.
Областа во Санта Марија ди Галерија е приближно десет пати поголема од самиот Ватикан. Од 1951 година има екстратериторијален статус, а од 1957 година таму се наоѓаат предавателните кули и комутацискиот центар на Ватиканското радио.
За агроволтаичната централа се одговорни Администрацијата на имотот на Апостолската столица, APSA, и Гувернаторатот на Државата Ватикански Град.
Ватикан њуз/к.мк
