Светиот Престол е „длабоко загрижен“ за „сè поголемиот број“ млади жртви на конфликти, војни и раселувања ширум светот. Претставникот на Ватикан, надбискупот Габриеле Качија, изјави во Њујорк дека образованието може да помогне во градењето култура на мир.
Разорни последици врз младите
Во својот говор, постојаниот набљудувач на Светиот Престол во Обединетите нации се осврна на „разорните последици“ од фактот што сè повеќе млади страдаат од војни, конфликти и раселување, „што им ја одзема иднината“.
Војна, криминал и радикализација преку интернет
„Некои се вовлечени во радикализација и насилство – феномен особено распространет преку интернет“, рече Качија. „Други, без реални алтернативи, паѓаат во стапицата на криминалот“.
Италијанскиот дипломат зборуваше во вторник, 2 септември, во Њујорк на форум посветен на спроведувањето на „Програмата за акција за култура на мир“ на ОН, чија цел е промовирање на одржлив мир преку различни образовни мерки.
Образование и искуства на братство
Надбискупот Качија ја истакна „преобразувачката сила на братството и пријателството“. Како пример го наведе Јубилејот на млади во Рим, кој во мир собра еден милион млади од целиот свет за време на Светата година. Тој се повика и на папата Лав XIV, кој се залагаше за „невооружен и разоружувачки мир“ во сите сфери на општествениот и светскиот живот.
Акциона програма за култура на мир
Ватиканскиот претставник нагласи дека охрабрувањето, поддршката и едукацијата на младите се од суштинско значење за градење „култура на мир“. Тоа може да поттикне „почитување на различностите“, подготвеност за дијалог и стремеж кон општото добро.
Повикајќи се на Програмата за акција на ОН за култура на мир, тој ја подвлече важноста на сеопфатното образование и воспитувањето за човекови права (Резолуција на ОН од 1999, член 4). Родителите, наставниците, политичарите, новинарите, религиозните институции и заедниците имаат „клучна улога“ (член 8) во промовирањето на култура на мир, толеранција, почитување на човековото достоинство и недискриминација.
Ватикан њуз/к.мк
