По повод упокојувањето на сестра Агнела, милосрдна сестра од Светиот Крст, Н.В.П. монсињор Киро Стојанов, Скопски бискуп и Струмичко-скопски епарх, упати сочувство до монашката заедница Милосрдни сестри од Светиот Крст, како и до членовите на нејзиното семејство, роднините и блиските.
Во својата порака, бискупот Стојанов изразува тага поради заминувањето на сестра Агнела, истовремено нагласувајќи ја христијанската надеж во воскресението. „Ожалостени од веста за упокојувањето на сестра Агнела, а поткрепени со христијанската надеж, во мое име и во име на целата Католичка црква во Македонија, го изразувам нашето искрено сочувство до Вашата монашка заедница, како и до членовите на нејзиното семејство, роднините и блиските“, стои во пораката со соувство.
Бискупот се осврнува и на нејзиното долгогодишно служење, потсетувајќи со благодарност за нејзината верна и пожртвувана служба во Црквата во Македонија. Животот на сестра Агнела, како што се наведува, бил обележан со верност кон Црквата и со јасно сведоштво за радоста со која го живеела својот монашки повик.
Во пораката на сочувство, бискупот Стојанов ја истакнува и утехата што ја дава Светото Писмо, повикувајќи се на зборовите на свети апостол Павле: „Да не тажите како и другите, што немаат надеж. Зашто, ако веруваме дека Исус умре и воскресна, така Бог и упокоените преку Исус ќе ги доведе со Него“ (1 Солуњаните 4,13–14).
На крајот, Скопскиот бискуп уверува во своите лични молитви, како и во молитвите на целата Католичка црква во Македонија, молејќи го милосрдниот Бог да ѝ дарува на сестра Агнела вечен покој, а на сестрите од заедницата и на нејзиното семејство утеха, мир и надеж во воскресението.
„Вечен покој дади ѝ, Господи, и вечна светлина нека ѝ свети. Нека почива во мир“, стои на крајот во пораката.
Сестра Агнела долги години служеше во Ординаријат и беше грижлива и посветана во исполнувањето на својата мисија во Македонија. Почина во Ѓаково, на 4 февруари 2026 година во 22:00 часот, окрепена со Светите Тајни, на 94-годишна возраст и 67. години од своите монашки завети.
к.мк
