За време на молитвата Ангел Господов, во недела 22 јуни 2025 година, по повод празникот на Пресветото Тело и Крв Христова, папата Лав XIV ја нарече Евхаристијата „жртва на љубовта за спасение на светот“.
„Господ ги прима, ги осветува и ги благословува лебот и виното што ги принесуваме на олтарот, заедно со дарот на нашите животи, и ги преобразува во Тело и Крв Христова – жртва на љубовта за спасение на светот.“
Со овие зборови, папата Лав XIV се обрати за време на својот говор по молитвата Ангел Господов во неделата.
Папата потсети дека на многу места ширум светот, Црквата го прославува празникот Пресветото Тело и Крв Христова – Corpus Christi – со евангелското читање според свети Лука, во кое се опишува чудото со лебовите и рибите.
Евангелието раскажува како Исус, гледајќи ја гладната толпа што Го следела во потрага по поука и исцеление, ги повикува апостолите да Му го понудат она малку што го имаат. Тој ги благословува лебовите и рибите и им заповеда да ги поделат на сите. Чудото, како што забележа Папата, не се состои само во тоа што сите се наситиле доволно, туку и во тоа што останало во изобилство.
„Ова чудо е, покрај сè, знак,“ истакна папата Лав, додавајќи: „не потсетува дека дури и најмалите Божји дарови растат кога се споделуваат.“
Божјото споделување со нас
Папата нагласи дека на овој празник верниците се повикани да размислат за големата вистина што стои зад ова чудо – споделувањето на самиот Бог со човештвото. „Бог, Создателот, кој ни го подари животот, заради нашето спасение избра едно од Своите созданија да стане Негова Мајка. Таа Му даде тело – кршливо, ограничено и смртно како нашето – и Тој Себеси ѝ се довери како дете.“
Преку оваа тајна, рече Папата, Господ целосно ја прегрнува човечката сиромаштија, избирајќи за нашето откупување да се послужи со малкуто што можеме да Му го понудиме.
„Колку е благородно кога некој ќе даде дар – иако скромен – со цел да ја искаже љубовта,“ рече Светиот Отец. „Среќни сме кога чувствуваме дека тој дар, колку и да е едноставен, нè зближува со оние што ги сакаме.“
Евхаристијата – дар и преобразба
Во Евхаристијата, продолжи Папата, се случува слично: преку осветувањето на лебот и виното, заедно со принесувањето на нашите животи, Бог ги преобразува овие дарови во Тело и Крв Христова, за спасение на светот. Тој радосно го прифаќа она што Му го принесуваме, соединувајќи се со нас и поканувајќи нè да го прифатиме и споделиме Неговиот дар на љубовта.
Цитирајќи го свети Августин, Папата додаде: „Како што од многу зрна пченица се создава еден леб, така и преку слогата на љубовта се оформува едно Тело Христово.“
Евхаристиска процесија во Рим
Во завршниот дел од обраќањето, Светиот Отец најави дека во неделата попладне ќе ја предводи традиционалната евхаристиска процесија во Рим, која ќе започне со света Литургија во базиликата Свети Иван Латерански, а ќе заврши пред базиликата Света Марија Велика.
„Ќе ја прославиме светата Литургија заедно, потоа ќе излеземе на улиците носејќи го Пресветото Тајна, ќе пееме, ќе се молиме и ќе Го замолиме Господа да го благослови нашиот град, нашите домови, нашите семејства и целото човештво,“ рече тој.
Папата заврши молејќи се оваа прослава да биде „сјаен знак на нашата определба, секој ден, почнувајќи од олтарот и завршувајќи со секојдневните односи, да бидеме носители на заедништво и мир, преку споделување и милосрдна љубов.“
