Папата Лав XIV ја отвори судската година на Ватиканскиот трибунал и потсети на длабоката врска меѓу правдата, љубовта и општествената стабилност.
На свеченото отворање на судската година на Државата Град Ватикан, папата Лав XIV изрази благодарност за „дискретната и тивка“ работа на судскиот систем.
Во своето прво обраќање до ватиканското судство, Папата нагласи дека автентичната правда не може да се темели само на позитивното право, туку мора да се разбере како „вршење на уредена форма на љубов“.
Повикувајќи се во голема мера на учењето на свети Августин, папата Лав истакна дека правдата е една од главните доблести што стои во срцето на личниот и заедничкиот живот.
„Кога љубовта е правилно уредена, кога Бог е ставен во центарот и ближниот е признаен во своето достоинство, тогаш целиот личен и општествен живот повторно ја наоѓа својата вистинска насока“, рече тој.
Поредокот на љубовта, додаде Папата, го раѓа поредокот на правдата, затоа што вистинската љубов никогаш не е произволна или неуредна, туку ја признава вистината на односите и достоинството на секоја личност.
„Богословската мудрост ја изразила оваа врска со тврдењето: caritas perfecta, perfecta iustitia est (‘совршената љубов е совршена правда’), затоа што во полнотата на љубовта правдата го наоѓа своето најавтентично исполнување“, рече тој.
Правдата, истакна Папата, бара да се почитуваат правата на секого, оставајќи простор во уредените односи да се роди највисокиот плод на љубовта.
„Правдата, кога се врши со рамнотежа и верност кон вистината, станува еден од најцврстите фактори на единство во заедницата“, рече тој. „Таа не разделува, туку ги зацврстува врските што ги обединуваат луѓето и помага да се изгради взаемна доверба, која го прави можен уредниот соживот.“
Правдата и правото во Државата Град Ватикан
Осврнувајќи се на улогата на правдата и правото во Државата Град Ватикан, папата Лав XIV рече дека судскиот процес придонесува за зачувување на веродостојноста на институциите, а не само за решавање спорови.
Условите што се потребни за тоа, додаде тој, вклучуваат почитување на процесните гаранции, судска непристрасност, право на одбрана и разумно времетраење на постапките.
Цитирајќи го свети Августин, Папата рече: „Без правда не може да се управува со државата; невозможно е да има закон во држава во која нема вистинска правда.“
Со внимателно испитување на фактите во секој случај, ватиканското судство, нагласи Папата, ја исполнува својата црковна мисија да му служи на Божјиот народ, затоа што секоја постапка и пресуда треба да го одразува „барањето на вистината, кое е во срцето на животот на Црквата“.
Правда осветлена од вистината и придружена од милоста
Папата Лав XIV го заврши обраќањето потсетувајќи дека автентичната правда е важен фактор на стабилност и доверба во општеството.
„Нека правдата секогаш биде осветлена од вистината и придружена од милоста, затоа што и двете ја наоѓаат својата полнота во Христос“, рече тој. „Законот, така применет со исправност и црковен дух, станува драгоцено средство за градење заедништво и за зацврстување на единството на Божјиот народ.“
Ватикан њуз/к.мк
