Папата Лав XIV се врати во Рим со авион што го отстапи шпанскиот крал Фелипе VI, откако технички проблем го спречи првично предвидениот авион да полета од аеродромот „Лос Родеос“ на Тенерифе.
Папата Лав XIV се врати во Рим со авион што го отстапи Неговото Височество, кралот на Шпанија. Летот беше предвиден да полета околу 18:00 часот по локално време и да пристигне во Рим околу 23:00 часот по римско време.
Персоналот на Светиот Престол и новинарите што патуваа со папскиот лет требаше да се вратат во наредните часови со посебен авион обезбеден од „Иберија“.
Соопштението, објавено од Канцеларијата за печат на Светиот Престол преку Телеграм, следуваше по технички проблем што го спречи авионот на „Иберија“, кој требаше да го врати Папата во Рим, да полета според планираното.
Авионот што го отстапи шпанскиот крал полета нешто по 18:00 часот по локално време.
Невообичаен крај на папското патување
Така, со невообичаен развој на настаните на аеродромот Северен Тенерифе, познат и како „Лос Родеос“, заврши четвртото меѓународно апостолско патување на папата Лав XIV.
Еднонеделната посета го водеше Папата во Мадрид, Барселона, Лас Палмас де Гран Канарија и Тенерифе.
Полетувањето беше значително одложено поради технички проблем со моторот на авионот „Ербас А320“ на „Иберија“. Авионот ги започнал процедурите за полетување околу 16:15 часот по локално време.
Сепак, кратко потоа, скалите за качување повторно биле вратени до авионот, а папата Лав XIV бил придружен до ВИП-салонот на аеродромот од кралот Фелипе VI, кој само неколку моменти претходно се збогувал со него.
Набргу потоа се симнале и државниот секретар, кардиналот Пјетро Паролин, како и другите кардинали и епископи што ја придружувале папската делегација.
Церемонијата на испраќање
Церемонијата на збогување се одржа според предвидениот распоред.
По пристигнувањето на аеродромот околу 15:45 часот по локално време, папата Лав XIV беше пречекан од шпанскиот крал Фелипе VI, од претставници на локалните власти и од претставници на локалната Црква.
По интонирањето на националните химни и оддавањето почести на знамињата, Папата и кралот ја разгледаа почесната гарда, а потоа ги поздравија своите делегации.
Иако техничкиот проблем го измени планот за враќање, патувањето заврши со гест на внимание од шпанскиот крал, кој овозможи Папата да се врати во Ватикан со посебно обезбеден авион.
Ватикан њуз/к.мк
