На средбата со Синодот на епископите на Грко-мелкитската црква, папата Лав XIV ги повика верниците да сведочат за помирувањето и да бидат семе на заедништво во земјите обележани со насилство.
Папата Лав XIV во сабота, 10 октомври 2026 година, ги прими на аудиенција членовите на Синодот на епископите на Грко-мелкитската католичка црква во Антиохија.
Тој потсети дека токму во Антиохија следбениците на Исус Христос за првпат биле наречени „христијани“, нагласувајќи дека и денес сме повикани да живееме на начин што сведочи за Божјото присуство меѓу нас.
„Вие не ја носите верата само во вашиот ум“, рече тој, „туку дозволувате таа да ги проникне вашите срца, поттикнати од Духот да споделувате храна со гладните, да обезбедувате образование и здравствена грижа, да ги придружувате и охрабрувате оние што страдаат, да ѝ овозможите на Црквата да биде светилник, светлина Христова, особено во ова бурно време.“
Папата Лав забележа дека многу од подрачјата во кои е присутна Грко-мелкитската црква се погодени од војни, немири, верски екстремизам и економски кризи.
Среде тие искушенија и во нивната желба да Го следат Христос, Папата ги увери грко-мелкитските католички верници во својата близина и ја потврди солидарноста на целата Католичка црква.
„Особено мислам на раните и тешкотиите со кои се соочувате и кои принудуваат многу од вашите верници да заминат во далечни земји, да најдат работа, да избегаат од опасности, а понекогаш и од прогонства, и да ги подигнат своите семејства во безбедност“, рече тој.
Повик за помирување и мир
Во исто време, Грко-мелкитската црква има голема привилегија да биде „икона на вековната вера на најсветите места на нашето спасение“.
„Колку голем повик има вашата Црква: да биде сведок на помирувањето и мирот во земјите опустошени од конфликти“, рече Папата. „Вие сте семе на заедништво во земјите обележани со насилство.“
Папата Лав истакна дека Грко-мелкитскиот синод е чувар на заедништвото, помагајќи им на верниците да се стремат кон единство, за сите луѓе да можат да Го препознаат Христос во нив.
„Мораме секогаш да бидеме будни за да не паднеме во искушението да се издигнуваме над другите, барајќи моќ наместо служба, корист наместо транспарентност и чесност, и личен успех наместо пастирска грижа“, рече тој.
Во болните моменти кога гневот и стравот нè искушуваат, најсилно ја сведочиме верата и Евангелието кога избираме „да покажеме љубов“, рече Папата, нагласувајќи дека свештенството има особена одговорност да го даде тоа сведоштво.
Потоа папата Лав се помоли грко-мелкитското свештенство да продолжи да ги воспитува младите во христијанската надеж и љубов.
„Низ историјата видовме дека искушенијата со кои се соочуваме, било да станува збор за мачеништво или за едноставните жртви што ги правиме од љубов кон ближниот, ни даваат можност да ја покажеме нашата вера на начин што одекнува во срцата на оние што бараат вистински мир“, рече тој.
На крајот, папата Лав ја изрази желбата на Светиот Престол да продолжи да го поддржува католичкото образование на Блискиот Исток, потсетувајќи на поддршката за стипендии наменети за верниците во Сирија, Либан и Ирак.
„Нашата цел е да ги поддржиме младите“, рече тој, „за христијанските семејства да ја добијат потребната помош за да останат на Блискиот Исток и да го зачуваат христијанското присуство.“
Стипендии за католичко образование
Одделно, Дикастеријата за Источните цркви објави соопштение во кое подетално ја објаснува оваа пасторална иницијатива.
„Неговата Светост наложи преку Дикастеријата за Источните цркви на овие заедници да им бидат обезбедени стипендии за покривање на годишните школарини за нивните деца во училиштата и на универзитетите“, се наведува во соопштението. „Со овој гест на татковска грижа кон децата, адолесцентите, младите и нивните семејства, папата Лав XIV сака да ја изрази својата близина и близината на целата Католичка црква со верниците кои многу страдаат поради конфликтите и нестабилноста што со години ги погодуваат овие земји.“
Ватикан њуз/к.мк
