Во пораката до учесниците на годишното Национално собрание на Pax Christi во САД, папата Лав XIV истакна дека „напорите за промовирање на ненасилство се уште понеопходни“ во свет кој се соочува со предизвици, вклучувајќи војна, поделби и присилна миграција.
„Среде бројните предизвици со кои се соочува нашиот свет во ова време, вклучувајќи ги широко распространетите вооружени конфликти, поделбите меѓу народите и предизвиците на присилната миграција, напорите за промовирање на ненасилство се уште понеопходни“, вели папата Лав XIV во порака до Националното собрание на Pax Christi во САД.
Американскиот огранок на меѓународното католичко мировно движење се состанува во Детроит, Мичиген, овој викенд (25-28 јули) на конференција фокусирана на „Враќање на моќта на ненасилството во еден скршен свет“.
Во својата порака, која им беше прочитана на учесниците за време на церемонијата на отворање во петокот вечерта, 25 јули 2025 година, папата Лав XIV ги покани присутните да се потсетат дека „по насилството на Распнувањето, првите зборови на Воскреснатиот Христос до апостолите понудија мир“, мир кој е „невооружен и разоружувачки, смирен и истраен“.
Исус, продолжи Папата, „продолжува да ги испраќа своите следбеници во светот за да станат творци на мирот во нивниот секојдневен живот“. Затоа „уште е поважно Црквата, способна за помирување, да биде присутна и видлива“ во парохиите, соседствата и особено на периферијата на општеството.
Папата Лав XIV изрази надеж дека Националната конференција ќе ги инспирира членовите на Pax Christi во САД да работат на тоа да ги направат своите локални заедници „куќи на мирот“ каде што се учи како да се смири непријателството преку дијалог, каде што се практикува правдата и се цени простувањето.
Правејќи го тоа, рече тој, „ќе им овозможите на многу повеќе луѓе да ја прифатат поканата на Свети Павле да живеат во мир со своите браќа и сестри“.
Светиот Отец ја заврши својата порака доверувајќи го собранието под застапништвото на Марија, Мајката на Црквата, и давајќи им го својот апостолски благослов на учесниците.
Ватикан њуз/к.мк
