На 26 јули 2017 година министерот за внатрешни работи на Македонија, Оливер Спасовски се сретна со поглаварите на верските заедници:Скопскиот бискуп и Апостолски егзарх во Македонија Н.В.П. монс. д-р Киро Стојанов, г.г. Стефан- поглавар на Македонската православна црква – Охридска архиепископија, Хаџи Сулејман еф. Реџепи- поглавар на Исламската верска заедница, Емил Заев, претседател на Евангелско – методистичката црква и Берта Романо – Николиќ, претседател на Еврејската заедница на Македонија.
Претставниците на верските заедници се заблагодарија на иницијативата на министерот Спасовски за одржување на ваква средба, потенцирајќи дека ова е прва ваква средба со министер за внатрешни работи и дека средби од ваков тип се потребни и во иднина за да се реагира заеднички при евентуалните обиди за злоупотреба на религијата – стои во оопштението од МВР.
Во понатамошниот текст се вели: На средбата беше нагласено дека верската толеранција и почитувањето на различностите се основни принципи што треба да се негуваат во едно мултикултурно и мултиконфесионално општество како нашето. Лидерите на верските заедници најостро ги осудија сите обиди за создавање на нетрпеливост или верска омраза меѓу граѓаните, притоа имајќи ги предвид неодамнешните настани како сквернавењето на гробиштата во скопското село Љуботен и злоупотребата на децата во приватна установа за згрижување на деца во Скопје.
Министерот Спасовски нагласи дека полицијата, во рамки на своите законски надлежности, безусловно ќе ги спречи сите обиди за поттикнување на верска омраза и нетрпеливост, спротиставувајќи се на сите облици на екстремизам. Тој ги информираше поглаварите на верските заедници дека интензивно се работи на расчистување на случаите кои ја вознемирија јавноста и дека граѓаните ќе бидат соодветно информирани за тоа. Истовремено Спасовски потенцираше дека МВР останува отворена за секаква иницијатива, соработка или заеднички активности во областа на превентивното делување.
к.мк/Фото: МВР
