Во неделното размислување за време на молитвата Ангел кое се фокусираше на неделното Евангелие, Папата Лав објасни како Евангелието нè учи дека за вистинска праведност, треба да љубиме многу.
Во своите вообичаени размислувања за неделното евангелско читање пред молитвата Ангел Господов, во недела 15 февруари 2026 година, Папата Лав објасни дека „Исус нè повикува да влеземе во новоста на Божјото Царство“. Тој истакна дека Евангелието за оваа недела зборува како Исус, откако ги објави Блаженствата, го открива вистинското значење на заповедите од Мојсеевиот Закон, кои нè повикуваат „во однос на љубов со Бога и со нашите браќа и сестри“. Затоа Исус вели дека не дојде да го укине Законот, туку да го исполни.
„Законот се исполнува токму преку љубовта, која го доведува до крај неговото длабоко значење и конечна цел.“
Папата нагласи дека праведноста не се ограничува само на држење на заповедите, туку „нè отвора за љубов и нè принудува да љубиме“. Потоа Исус разгледува некои од заповедите што се однесуваат на конкретни случаи и ја покажува разликата меѓу формалната религиозна праведност и праведноста на Божјото Царство. Ова, објасни Папата Лав, ни покажува дека Законот даден преку Мојсеј и пророците е пат за да го запознаеме Бога и Неговиот план за нас и за историјата на спасение.
„Самиот Бог, во личноста на Исус, дојде меѓу нас, исполнувајќи го Законот, правејќи нè деца на Отецот и давајќи ни благодат да влеземе во однос со Него како деца и како браќа и сестри меѓу себе… Исус нè учи дека вистинската праведност се состои од љубов и дека, во секоја заповед од Законот, мора да научиме да препознаеме повик на љубов.“
Папата потоа потсети на примерите што Исус ги даде, покажувајќи дека минималната праведност не е доволна, „потребна е голема љубов“, која е возможна благодарение на Божјата сила. Тој се помоли Пресвета Дева Марија да „се застапува за нас“ и „да ни помогне подобро да го разбереме Божјото Царство и да го живееме неговиот повик за праведност“.
Ватикан њуз/к.мк
