За време на посетата на казнено-поправниот центар „Брианс 1“, папата Лав XIV ги потсети затворениците дека животните грешки не го дефинираат идентитетот на човекот. Тој нагласи дека Господ никогаш не престанува да ја покажува Својата љубов, која е поголема од секое добро или зло што сме го направиле.
„На секој од вас му велам: Бог ве сака токму такви какви што сте, но сонува да бидете уште подобри! Господ на сите ни дозволува да започнеме одново, бидејќи да се биде човек и да се биде христијанин не значи никогаш да не се прават грешки, туку да се расте во способноста за преобраќање, покајание, поправање и, пред сè, за помирување и простување.“
Со овие силни зборови папата Лав XIV им се обрати на затворениците во среда наутро, 10 јуни 2026 година, за време на посетата на казнено-поправниот центар „Брианс 1“, во рамките на своето апостолско патување во Шпанија.
Папата истакна дека ова е утешна вистина што нè придружува во секое време. Таа нè потсетува дека Божјата милосрдна љубов секогаш е поголема од сè што сме направиле, било добро или лошо.
„Секое човечко суштество“, нагласи Светиот Отец, „е достојно само поради фактот што е љубено, создадено и сакано од Бога. Затоа не постои ситуација што може да го натера Господ да го сврти Својот поглед од нас.“
Подигнете ги очите кон Оној што секогаш ве љуби
Папата рече дека оваа вистина е особено важна за оние што го носат товарот на оддалеченоста од своите најблиски и кои страдаат поради околностите во кои се наоѓаат.
„Кога сте во искушение да се чувствувате помалку вредни и да мислите дека не вреди да продолжите“, рече папата Лав, „подигнете ги очите кон Оној Кој, преку присуството на толку многу луѓе, никогаш не престанува да ви ја покажува Својата љубов и близина.“
Не дозволувајте вознемиреноста и тагата да ве понижат
Папата призна дека вознемиреноста и тагата можат да обележат одредени моменти од животниот пат. Но истовремено потсети дека животните грешки не го дефинираат идентитетот на човекот.
Тој се осврна на свети Августин, кој во своите „Исповеди“ зборува за тоа како Господ го придружува човекот на неговиот животен пат.
„Ако се потпираме на божествената благодат и дозволиме таа да нè води и преобразува, во нашите животи откриваме дека минатото не ја осудува иднината, туку, како што продолжува големиот светец, ни нуди можност да ги промениме нашите одлуки и избори“, рече Папата.
Затоа папата Лав ги повика затворениците да Му направат место на Господ во своите срца и да го бараат Неговото лице.
„Да дозволиме Неговата љубов да нè води. Да се држиме до Него, Кој постојано нè повикува на надеж“, рече тој.
Бог ни отвора хоризонт што не може да биде затворен
Папата увери дека Господ ни покажува прекрасен хоризонт до кој ниту една физичка бариера не може да нè спречи да стигнеме.
И денес, истакна тој, Господ продолжува да ни зборува во длабочините на нашата совест, помагајќи ни да откриеме дека Тој живее меѓу нас.
Тој чека да Му дадеме можност
„Тој само чека ние да Му дадеме можност“, рече Папата.
Затоа папата Лав ги повика присутните да не престанат да го сонуваат Божјиот сон и да Му дозволат на Господ да им помогне да започнат одново.
„Ве поканувам да продолжите да го сонувате Божјиот сон и да Му дозволите повторно да започнете“, рече тој.
Со овие зборови на утеха, папата Лав XIV го заврши своето обраќање, доверувајќи ги затворениците на посебен начин на мајчиното застапништво на Пресвета Богородица Милосрдна, а потоа им го подели својот апостолски благослов.
Ватикан њуз/к.мк
