Папата Лав XIV ја напушти Апостолската палата во Кастел Гандолфо и се врати во Ватикан по повеќе од три недели одмор. При заминувањето ги поздрави присутните пред резиденцијата и благослови неколку деца.
Папата Лав XIV го напушти Кастел Гандолфо во понеделник навечер, 27 јули 2026 година, враќајќи се во Ватикан по периодот на одмор што започна на 5 јули.
Додека неговиот автомобил тргнуваше од папската резиденција, Папата ја поздрави групата луѓе што се собраа да го испратат и благослови неколку деца што го чекаа заедно со своите родители.
Тој повторно ќе се врати во Кастел Гандолфо во среда, 29 јули, за да присуствува на „Песна на мирот“ (Cantico di Pace), собир на молитва и братство.
Настанот, промовиран од Центарот за високо образование „Laudato si’“ и Фондацијата „Андреа Бочели“, е дел од одбележувањето на 800-годишнината од смртта на свети Фрањо Асишки. Ќе започне во 19 часот во градините на Папските вили.
Денови во Кастел Гандолфо
За време на својот 23-дневен престој во Кастел Гандолфо, папата Лав XIV посвети време на молитва, читање и малку спорт.
Малиот град, кој гледа кон езерото Албано во Албанските ридови надвор од Рим, е вброен меѓу најубавите села во Италија.
Покрај четирите неделни средби со верниците, на 5, 12, 19 и 26 јули, кога ја предводеше молитвата „Ангел Господов“ од влезот на Апостолската палата, папата Лав XIV учествуваше и на уште два јавни настани.
На 11 јули, во папските градини ручаше со 200 лица од Римската епархија што живеат во состојби на социјална ранливост, меѓу кои имаше и 35 деца.
Една недела подоцна, на 18 јули, присуствуваше на концерт организиран од Епархијата Албано во дворот на Апостолската палата.
Папата оствари и три приватни посети во текот на последната недела од својот престој.
На 20 јули ја посети Бенедиктинската опатија во Монтекасино. На 22 јули отпатува во Светилиштето на Пресветата Троица во Валепјетра, а потоа ги посети манастирите на свети Бенедикт и света Схоластика во Субјако.
Со ова заврши неговиот летен престој во Кастел Гандолфо, обележан со молитва, средби со верниците и неколку значајни моменти на близина со луѓето.
Ватикан њуз/к.мк
