Папата Лав XIV ги прими членовите на Меѓународната мрежа на католички законодавци, собрани на нивниот годишен состанок на тема „Новиот светски поредок: политиката на големите сили, доминацијата на мултинационалните компании и иднината на човечкиот просперитет“. Загрижени сме за насоката во која се движи светот, нагласи Папата, но сепак посакуваме вистински човечки просперитет, свет во кој секој човек може да живее во мир, слобода и исполнетост според Божјиот план.
Градење мостови помеѓу Градот на човекот и Градот Божји – ова е охрабрувањето на Папата во говорот што го одржа денес, 23 август 2025 година, на аудиенцијата со приближно 150 членови на Меѓународната мрежа на католички законодавци, собрани во Ватикан за Јубилејот на надежта, по повод нивниот 16. годишен состанок посветен на темата „Новиот светски поредок: политиката на големите сили, доминацијата на мултинационалните компании и иднината на човечкиот просперитет“. Учењето на Свети Августин, кого Папата го спомена како водечки глас на Црквата во доцната римска ера, сведок на огромни превирања и социјална дезинтеграција, повторно е компас за изнаоѓање рамнотежа во светот што се движи во „загрижувачки“ насоки.
Стремеж за вистински просперитет за човечкото семејство
Пораката на Папата, упатена до католичките законодавци и политичките лидери, од една страна изразува загриженост, а од друга страна желба за вистинска човечка благосостојба, свет во кој секој човек може да живее во мир, слобода и исполнетост според Божјиот план. Папата се задржа на „желбата за мир“. Светителот од Хипо нудел, и продолжува да го нуди и денес – потсети Папата – хоризонтот на надеж и значење пронајдено во неговото незаборавно дело „ De Civitate Dei“ (напишано помеѓу 413 и 426 година), во кое историјата е скицирана како борба помеѓу два модели на живот: оној на Градот на човекот, заснован на гордост и самољубие, обележан со потрагата по моќ, престиж и задоволство; и Градот Божји, заснован на љубов кон Бога до степен на алтруизам, обележан со правда, милост и понизност.
Августин ги охрабрил христијаните да го заситат земното општество со вредностите на Божјото Царство, насочувајќи ја историјата кон нејзиното конечно исполнување во Бога, а во исто време овозможувајќи автентичен човечки просперитет во овој живот. Оваа теолошка визија може да ни понуди упориште во услови на денешните променливи струи: појавата на нови центри на гравитација, нестабилноста на старите сојузи и невиденото влијание на мултинационалните корпорации и технологијата, а да не ги спомнуваме и многуте насилни конфликти. Клучното прашање што ние, верниците, мора да си го поставиме е: како можеме да ја исполниме оваа задача?
Што значи просперитетен живот?
Потоа Папата го објасни значењето на просперитетен живот, кој – како што забележа – често се меша со материјално богат живот или живот на индивидуална автономија без ограничувања. Технолошката погодност и задоволството на потрошувачите генерално се сметаат за параметри на идеална иднина – забележа папата Лав XIV, додавајќи – Сепак, знаеме дека ова не е доволно. Го гледаме ова во богатите општества, каде што многу луѓе се борат со осаменост, очај и чувство на бесмисленост.
Автентичниот човечки просперитет произлегува од она што Црквата го нарекува интегрален човечки развој, односно целосен раст на личноста во секоја димензија: физичка, социјална, културна, морална и духовна. Оваа визија за човечката личност е вкоренета во природниот закон, моралниот поредок што Бог го впишал во човечкото срце, чии најдлабоки вистини се осветлени од Евангелието Христово. Во оваа смисла, автентичниот човечки просперитет се пројавува кога луѓето живеат доблесно и во здрави заедници, уживајќи не само во она што го имаат, туку и поради тоа што се Божји деца. Тоа ја обезбедува слободата да се бара вистината, да се обожава Бога и да се воспитуваат семејства во мир. Исто така, вклучува хармонија со созданието и чувство на солидарност меѓу општествените класи и народите.
Градење мостови помеѓу Градот на човекот и Градот на Бога
Папата инсистира дека мора да избереме што сакаме како основа на општеството: љубов кон себе или љубов кон Бога и ближниот. Ова е уште понеопходно во услови на актуелните предизвици, кои се огромни, но во однос на кои – нагласи Папата – Божјата благодат што дејствува во човечките срца е уште помоќна. Папата Лав XIV се осврна на говорот на папата Фрањо пред дипломатскиот кор во јануари оваа година, во кој зборуваше за „дипломатијата на надежта“, која продолжува да се покажува како фундаментална, заедно со – како што додаде папата Лав – „политиката на надежта“ и „економијата на надежта“. На крајот, Папата го упати својот благослов за работата на мрежата католички законодавци со охрабрување дека целта на нивните напори е вистинскиот процут на човечкото семејство.
Во вашата професија како католички законодавци и јавни службеници, сте повикани да градите мостови помеѓу градот на човекот и градот Божји. Ве охрабрувам да се залагате за свет во кој власта е водена од совеста и во кој законот е во служба на човечкото достоинство. Понатаму, ве охрабрувам да го отфрлите опасниот и контрапродуктивен менталитет дека ништо никогаш нема да се промени.
Меѓународна мрежа на католички законодавци
Меѓународната мрежа на католички законодавци е основана пред петнаесет години и обединува повеќе од илјада политичари од целиот свет. Таа обезбедува независна платформа за образование, политичка соработка и подобрување на билатералните односи. Нејзината мисија е да им понуди на христијаните вклучени во јавниот живот верско образование, специјализирано образование и глобална мрежа на колеги и пријатели, овозможувајќи им да практикуваат „добродетелно и ефикасно лидерство, посветено на заштита на достоинството на секое човечко битие“. Мрежата се претставува како реалност која не се занимава со лобирање или политички активизам и нагласува дека нејзината работа се заснова на идентификување на распаѓањето на моралното лидерство, недостатокот на политичка одговорност и брзото опаѓање на праведното законодавство.
Ватикан њуз/к.мк
