Во порака до меѓународната конференција на AIE, одржана во Сакрофано, Папата повика да ги придружуваме верниците кои страдаат поради ѓаволот со молитви за ослободување и утеха.
Лав XIV ја изрази својата благодарност до свештениците егзорцисти во порака што беше прочитана за време на 15-тата конвенција на Меѓународното здружение на егзорцисти (AIE), одржана од 15 до 20 септември 2025 година во духовниот центар „Фратерна Домус“ во Сакрофано, во близина на Рим. На состанокот учествуваа околу 300 свештеници и помошници на егзорцисти од сите континенти.
Победа над злото
Папата потсети дека службата на егзорцистот е „деликатна“, но „многу неопходна“, охрабрувајќи ги свештениците „да ја живеат и како служба на ослободување и како утеха, придружувајќи ги верниците кои се навистина опседнати од злото со молитва и повикување на Христовото присуство, за преку егзорцизмот Господ да може да им даде победа над сатаната“.
Конференцијата се состоеше од моменти на слушање и размислување, што ја потврди важноста на егзорцизмот како „конкретен знак“, објасни претседателот на AIE, монсињор Карел Орлита, „за љубовта на Црквата кон браќата и сестрите што страдаат“. Кардинал Артур Рош, префект на Дикастеријата за Божествено богослужение и дисциплина на Светите Тајни, служеше света Литургија во Сакрофано.
Во својата проповед, тој се задржа на значењето на придружувањето на оние што страдаат од ѓаволот и кои, преку своето страдање, учествуваат во Христовите страдања. Кардиналот државен секретар Пјетро Паролин, во проповедта на Литургијата од 19 септември, потсети дека во Црквата служењето значи примање дар што треба да се чува и обновува во понизност; затоа, свештеникот егзорцист дејствува со дарот што му припаѓа на Христос.
к.мк
