Собирот ќе биде „простор за меѓусебно слушање, размислување и заедничко истражување на одредени прашања“, рече кардиналот Џовани Батиста Ре.
За следниот конзисториум, свикан од папата Лав XIV, се планирани неколку работни сесии и четири главни теми, од војна до синодалност.
Од размислување за меѓународната состојба, преку можноста за „ажурирање“ на учењето за праведната војна, па сè до дискусија за енцикликата Magnifica Humanitas и чекорите на синодалниот процес, кардиналите се повикани на широки дискусии во повеќе сесии.
Темите ги изложи кардиналот Џовани Батиста Ре, декан на Колегиумот на кардинали, во писмо испратено до сите кардинали на 3 јуни. Вонредниот конзисториум, втор свикан од Лав XIV, ќе се одржи од 26 до 27 јуни.
Конзисториумот „е наменет, пред сè, да биде простор за меѓусебно слушање, расудување и заедничко истражување на одредени прашања релевантни за животот и мисијата на Црквата во сегашно време“.
Папата „сака да го собере искуството и советите од членовите на Кардиналскиот колегиум и, истовремено, да може да смета на активната помош и поддршка од секој од нив во различните места и одговорности во кои тие ѝ служат на Црквата“.
Ре напиша дека „ќе биде важно нашата заедничка работа да се одвива во клима на слушање, слобода и парезија, со цел да се поттикне заедничко размислување за прашањата што ќе бидеме повикани да ги разгледаме“.
Кардиналот Ре ја опиша првата сесија како „заедничка медитација што започнува од меѓународната состојба“. Тој нагласи дека „во молитвена клима, ќе бидеме поканети пред Господа да го изнесеме она што го доживуваме во различни делови од светот и во локалните Цркви“.
Две прашања ќе го водат размислувањето: „Кои страдања, тензии и прашања денес најитно ги погодуваат народите и црковните заедници што ви се доверени? Кои знаци на надеж, верност кон Евангелието и можно помирување сметате дека е важно да ги внесете во заедничкото слушање?“
Енцикликата Magnifica Humanitas ќе биде во фокусот на втората и третата работна сесија. Особено, на втората сесија кардиналите ќе бидат повикани да размислуваат за петтото поглавје од енцикликата и да дискутираат за мирот како „услов за универзалното општо добро“ (Magnifica Humanitas, бр. 182).
Од кардиналите ќе се побара „да станат свесни за тоа како оваа реалност болно го засега искуството на многумина од нас, особено на оние што доаѓаат од подрачја погодени од војна, а истовремено ги предизвикува и другите контексти, каде што повторно се појавуваат јазици, логики и практики што ја ослабуваат можноста за помирување и соживот“.
Посебен фокус ќе биде ставен на концептот на праведна војна и на тоа „на кои конкретни начини може да им се помогне на христијанските народи и заедници да го зачуваат и градат мирот“.
Третата сесија ќе ги повика кардиналите да го продлабочат повикот од енцикликата да ги читаат преобразбите на нашето време во светлината на Евангелието, како што бара Magnifica Humanitas.
Четвртата сесија ќе биде поделена на два дела: најнапред ажурирање за процесот на спроведување на синодата, а потоа време за „слободен дијалог меѓу членовите на Колегиумот и Светиот Отец, со триминутни интервенции“.
Ре изрази надеж за „соодветна подготовка за средбата, не само преку внимателно разгледување на прашањата што треба да се разгледаат, туку пред сè преку молитва и обновено внимание кон животот на Црквите доверени на нивната пастирска грижа“.
Конзисториумот ќе заврши со Света Литургија на 29 јуни, на празникот на светите апостоли Петар и Павле, кога Папата ќе им го предаде палиумот на новите митрополитски надбискупи.
CNA/к.мк
