Сезоната на создадениот свет започнува со молитва низ целиот свет за нашиот заеднички дом
Христијаните ширум светот го одбележуваат 11. Светски ден на молитва за грижа за создадениот свет, со што започнува едномесечната екуменски период на молитва и дејствување за заштита на животната средина.
По повод 11. Светски ден на молитва за грижа за создадениот свет, кој се одбележува на 1 септември, христијаните ширум светот се повикани да се обединат во молитва и дело за заштита на создадениот свет.
Овој ден воедно го означува почетокот на годишната Сезона на создадениот свет, која трае до 4 октомври, празникот на свети Фрањо Асишки.
Додека светот продолжува да сведочи за страдањата и уништувањето предизвикани од климатската криза, која, како што папата Лав XIV постојано нагласува, е тесно поврзана со конфликти, раселувања и неправда, сите луѓе со добра волја се повикани да се вклучат во оваа екуменска иницијатива.
Денот на молитва за создадениот свет, кој го промовираат и поддржуваат различни организации, меѓу кои Движењето Laudato si’, Светскиот совет на црквите, Светската лутеранска федерација и Англиканската заедница, има корени што се протегаат речиси три децении наназад.
Клучни пресвртници
Овој ден првпат бил воспоставен во 1989 година од вселенскиот патријарх Димитриј I, кој го прогласил 1 септември за Ден на молитва за создадениот свет во Православната Црква. Датумот го означува почетокот на православната црковна година и потсетува на библискиот извештај за создавањето на светот.
Во 2007 година, Третото европско екуменско собрание предложило одбележувањето да се продолжи на пет недели, а Светскиот совет на црквите потоа ги поканил христијанските заедници ширум светот да го продолжат ова време на молитва и дејствување до 4 октомври.
Во 2015 година, кратко по објавувањето на енцикликата Laudato si’, папата Фрањо го воспостави Светскиот ден на молитва за грижа за создадениот свет во Католичката Црква. Со тоа Католичката Црква се усогласи со православното одбележување на 1 септември и формално ја прифати Сезоната на создадениот свет.
Декретот на папата Лав XIV, со кој се воспоставува Missa pro custodia creationis, односно Литургија за грижа за создадениот свет, заедно со новиот формулар за Римскиот мисал, претставува уште еден чекор во посветеноста на Католичката Црква да одговори на крикот на земјата и крикот на сиромашните.
Ватикан њуз/к.мкм
