Папата Лав XIV испрати почетна донација од 100.000 евра за итна помош во Венецуела, додека продолжуваат спасувачките напори по катастрофалните земјотреси во кои загинаа најмалку 164 лица и беше предизвикана голема материјална штета.
Повеќе од 150 лица се пријавени како загинати, многу други се повредени, а се стравува дека уште голем број луѓе се заробени под урнатините, откако два силни земјотреси ја погодија Венецуела во текот на ноќта.
Додека продолжуваат спасувачките напори и постепено се открива целосниот обем на катастрофата, папата Лав XIV испрати почетна итна донација од 100.000 евра преку Апостолската канцеларија за милостина.
Светиот Престол соопшти дека помошта, координирана со апостолскиот нунциј во Венецуела, надбискупот Алберто Ортега Мартин, и со надбискупот на Каракас, надбискупот Раул Биорд Кастиљо, е само прв чекор. Дополнителна помош ќе следи според потребите што ќе ги утврди локалната Црква.
Придонесот на Папата доаѓа во време кога католичките заедници низ целата земја ги отвораат парохиските објекти за да згрижат раселени семејства и да организираат итна помош преку локалните мрежи на Каритас.
Спасувачките екипи пребаруваат десетици урнати згради по земјотресите што се случија во средата навечер, со јачина од 7,2 и 7,5 степени.
Меѓународниот аеродром „Симон Боливар“ во Каракас останува затворен, а најголема штета е пријавена во крајбрежната сојузна држава Ла Гваира, северно од главниот град, каде што се урнале десетици згради.
Властите соопштија дека загинале најмалку 164 лица, а речиси илјада се повредени. Официјалните лица предупредуваат дека бројот на жртви може да се зголеми, бидејќи спасувачите продолжуваат да пребаруваат низ урнатините. Регионот го погодиле повеќе од дваесет последователни потреси, а тресењето се почувствувало дури и во Колумбија.
Претседателката Делси Родригез прогласи национална состојба на катастрофа и вонредна состојба, опишувајќи ја Ла Гваира како „зона на катастрофа“.
Министерот за внатрешни работи Диосдадо Кабело ги повика жителите да останат на отворено и подалеку од оштетените згради, додека инженерите ја проценуваат стабилноста на критичната инфраструктура.
Штетата е голема и сериозна. Црквите, меѓу кои катедралата во Каракас и неколку парохиски цркви, претрпеле структурни оштетувања. Погодени се и семинарии и други црковни објекти.
И покрај тоа, црковните водачи продолжуваат да обезбедуваат засолниште, храна и пасторална грижа за луѓето што ги загубиле своите домови.
Меѓународната помош почнува да пристигнува од цела Америка и од други делови на светот, додека екипите за пребарување и спасување се тркаат со времето, со надеж дека ќе пронајдат преживеани под урнатините.
Ватикан њуз/к.мк
