Папата Лав XIV во понеделник, 15 јуни 2026 година, се сретна со претставници на Обединетата еврејска апел-федерација на Њујорк, заблагодарувајќи ѝ се на организацијата за нејзината работа за помош на ранливите лица. Тој нагласи дека, во свет сè уште ранет од поделби и конфликти, декларацијата на Вториот ватикански собор Nostra aetate нè повикува „да ги надминеме недоразбирањата од минатото и да соработуваме за општото добро“.
„Признавајќи го вроденото достоинство на сите мажи и жени, Nostra aetate зазеде цврст став против антисемитизмот и изјави дека Црквата ги отфрла сите форми на дискриминација или вознемирување поради раса, боја на кожа, животна состојба или религија.“
Со овие зборови папата Лав XIV се обрати до претставниците на Обединетата еврејска апел-федерација на Њујорк, со кои се сретна во понеделник наутро во Ватикан.
Благодарност за помошта на ранливите
Светиот Отец ги поздрави присутните, потсетувајќи дека нивната организација служи како инструмент на глобалната еврејска филантропија, обезбедувајќи хуманитарна помош и социјални услуги за ранливите лица: сиромашните, бегалците, старите лица и лицата со попреченост, во Њујорк, Израел и во повеќе од седумдесет други земји.
„Овие напори“, рече папата Лав, „одразуваат јасно признавање на човечкото достоинство и братството, што е во склад со посветеноста на Црквата кон интегралниот човечки развој и со повикот да го љубиме својот ближен.“
Папата потсети дека оваа заедничка посветеност има посебно значење во светлината на заедничката историја на христијаните и Евреите, како и на нивното духовно потекло од Авраам, Исак, Јаков и Јосиф.
Nostra aetate и новиот хоризонт на средба
Светиот Отец потоа се осврна на значајниот документ на Вториот ватикански собор од 1965 година, декларацијата Nostra aetate за односот на Црквата кон нехристијанските религии, чија шеесетгодишнина Црквата ја одбележа минатата година.
Папата истакна дека овој документ „отвори нов хоризонт на средба, почит и духовно гостопримство“. Меѓу другото, тој ја потврди „вистината дека припаѓаме на едно човечко семејство“ и го осуди антисемитизмот, како и секоја форма на дискриминација или вознемирување поради раса, боја на кожа, животна состојба или религија.
Соработка за општото добро
„Во свет кој сè уште е ранет од поделби и конфликти“, нагласи папата Лав, Nostra aetate „нè повикува да ги надминеме недоразбирањата од минатото и да соработуваме за општото добро“.
Во тој дух, папата Лав го опиша служењето на сиромашните, маргинализираните и немоќните како „средство за средба со светото“, истакнувајќи дека преку нив Божјиот глас продолжува да ни зборува.
На крајот од своето обраќање, Светиот Отец им се заблагодари за нивната посветеност во помагањето на сиромашните и на оние на кои им е потребна помош, во спротивставувањето на омразата и нетолеранцијата, како и во работата за изградба на подобар свет за сите.
„Нека вашата мисија“, рече Папата, „го зајакне дијалогот, го продлабочи меѓусебното разбирање и придонесе за мирот што толку многу му е потребен на нашиот свет.“
Ватикан њуз/к.мк
