Во среда, 24 декември 2025 година свечената полноќна божиќна света Литургија во катедралата „Пресвето Срце Исусово“ во Скопје ја предводеше Скопскиот бискуп и Струмичко – скопски епарх монсињор д-р Киро Стојанов во сослужение со катедралниот парох дон Винко Маслаќ, деканот протојереј ставрофор отец Зоран И. Стојанов, бискупскиот канцелар о. Марјан Ристов и протојереј отец Гоце Костов
На свеченоста присуствуваше претседателката на Македонија Гордана Силјановска-Давкова, директорката на Комисијата за односи со верските заедници и религиозни групи Оливера Трајковска, претседателот на 62-то заседание на Генералното собрание на Обединетите нации Срѓан Керим, градоначалници, претставници на МПЦ – ОА, претставници на државни институции, членови на дипломатскиот кор во Македонија, црковни и граѓански асоцијации, претставници на општествениот живот и голем број верници.
Во својата Божиќна проповед, бискупот Стојанов се осврна на завршувањето на Светата Јубилејна 2025 година, истакнувајќи дека јубилејот беше посветен на помирувањето, солидарноста и обновата на верата, како и на размислување на односот кон човековото достоинство. Тој напомена дека воплотувањето на Божјото Слово, како централна христијанска вистина, му дава неповредливо достоинство на секој човек и ја осветлува смислата на човечкото постоење.
Во контекст на глобалните општествени и глобални предизвици, бискупот сврте внимание на насилството, војните и деградацијата на човечкото достоинство во различни делови од светот, нагласувајќи дека Божиќната порака повикува на поинаков поглед кон човекот и светот, кој е заснован на Христовата светлина. Во таа смисла, беше спомната и опасноста од комерцијализацијата на Божиќ, која може да ја засени суштината на празникот.
Во проповедта бискупот повика да го препознаеме нашето достоинство, но и на одговорно и критичко расудување во општествените процеси, предупредувајќи на релативизирање на вредноста на човечкиот живот при што рече дека никој нема право да го прекине, па и тогаш кога законските прописи сугерираат голема слобода, а всушност ги загрозуваат животите на старите и болните. Проповедта ја заврши, посакувајќи има на сите среќен и благословен Божик – Христос се роди!
За време на светата божиќна полноќна Литургија пееше катедралниот хор под водство на Јулија Нелковска, а на оргули свиреше Филип Костов и Лука Костов
к.мк
