Папата Лав XIV во вторник 9 декември 2025 година го прими украинскиот претседател Зеленски во Вила Барберини во Кастел Гандолфо. Тоа беше нивна втора приватна средба. Фокусот на разговорот беше цврстата желба актуелните дипломатски иницијативи да доведат до мир, како и прашањето за воените заробеници и враќањето на децата. Украинскиот претседател му подари на Папата рачно изработена украинска слика на раѓањето на Исус Христос.
Лондон, Брисел, а сега и Рим, почнувајќи од Кастел Гандолфо со средба со Папата. Украинскиот претседател Володимир Зеленски ја започна својата посета на Италија, како и ова лето, во резиденцијата на Папата во Кастел Гандолфо.
Дијалог и прашањето на затворениците и децата
Потребата од континуиран дијалог, заедно со цврста желба дипломатските иницијативи што се водат да доведат до праведен и траен мир, беа во срцето на получасовниот разговор меѓу папата Лав XIV и украинскиот претседател.
Според соопштението од Канцеларијата за печат на Светиот Престол, „беше споменато и прашањето за воените заробеници и потребата да се обезбеди враќање на украинските деца во нивните семејства“. Ова прашање беше покренато и кога Папата се сретна на 21 ноември во Апостолската палата во Ватикан со група мајки и сопруги на затвореници и адолесценти присилно однесени во Русија, кои се вратени во својата татковина.
Ватикан њуз/к.мк
